Irani ofron ndërmjetësim, ndërsa janë ndezur sërish luftimet mes Azerbajxhanit dhe Armenisë
Irani ka njoftuar gatishmërinë e tij për të ndërmjetësuar midis Armenisë dhe Azerbajxhanit, dy fqinjët e Kaukazit, në mes të shpërthimit të luftimeve që çuan në viktima të shumta nga të dyja palët.
Ministri i Jashtëm i Iranit Hossein Amir-Abdollahian i bëri komentet gjatë një telefonate të mërkurën me homologun e tij azerbajxhanas Xhejhun Bajramov. Diplomati i lartë iranian shprehu shqetësim serioz pasi tensionet e ndezura midis dy fqinjëve mbi rajonin e diskutueshëm të Nagorno-Karabakut kanë shkaktuar një konflikt të ri, duke lënë mbi 100 ushtarë të vdekur nga të dyja palët. Luftimet ishin shpërthimi më i fundit i dhunës midis dy fqinjëve që kur mijëra u vranë në një luftë 44-ditore mbi territorin e diskutueshëm të Nagorno-Karabakut në fund të vitit 2020. Amir-Abdollahian tha se Republika Islamike ishte e përgatitur për të ndihmuar në zgjidhjen e konfliktit në një mënyrë paqësore dhe përmes mjeteve politike. "Ne gjithmonë vëmë theksin në ruajtjen e integritetit territorial të vendeve, duke përfshirë atë të Azerbajxhanit dhe Armenisë," tha ai. Zyrtari iranian nënvizoi rëndësinë e ruajtjes së status quo-së në kufirin Iran-Armeni, duke e quajtur kufirin një "rrugë lidhëse historike ". Ai i ftoi të dyja palët të tregojnë vetëpërmbajtjen, duke këmbëngulur se rajoni nuk mund të toleronte një luftë tjetër. Nga ana e tij, zyrtari azerbajxhanas i konsideroi si konverguese pikëpamjet e Teheranit dhe Bakut për të ardhmen e rajonit, duke shprehur mirënjohjen ndaj Republikës Islamike për përpjekjet e saj për zgjidhjen e mosmarrëveshjes së Azerbajxhanit me Armeninë. Ndërkohë Bajramov pretendoi se vendi i tij nuk lakmon tokën e ndonjë vendi të huaj.
