Irani fillon pasurimin e uraniumit në nivelin 60%

Kreu i Organizatës së Energjisë Atomike të Iranit njoftoi se Irani ka filluar pasurimin e uraniumit në nivelin e pastërtisë prej 60% në objektin e tij bërthamor në Fordo, pas rezolutës së fundit që SHBA-ja dhe trojka evropiane iniciuan në Bordin e Guvernatorëve të Agjencisë Bërthamore të OKB-së për të rritur presionin ndaj Republikës Islamike. 

Mohammad Eslami deklaroi se Teherani nëpërmjet një letre ka informuar Agjencinë Ndërkombëtare të Energjisë Atomike (ANEA) për vendimin e tij. Ai e përshkroi masën si një mesazh të fortë për rezolutën e fundit kundër Iranit të miratuar nga Bordi i Guvernatorëve të ANEA. Irani instaloi gjithashtu dy kaskada të reja të centrifugave IR2M dhe IR4 në objektin e Natanzit, të cilat tani kanë arritur në fazën para injektimit të gazit të uraniumit në centrifuga. Kjo do të thotë se Irani praktikisht ka filluar pasurimin e uraniumit me anë të kaskadave të reja dhe procesi do të përfundojë brenda ditëve të ardhshme. Për më tepër, Irani ka instaluar centrifuga të reja në dy salla boshe në objektet bërthamore Fordo dhe Natanz, në atë që konsiderohet si një përgjigje vendimtare ndaj rezolutës kundër Iranit. Këto salla, nën angazhimin e Iranit ndaj kushteve të marrëveshjes bërthamore të vitit 2015, ishin bosh, por centrifugat janë instaluar sërish atje. Raporti i mediave iraniane vazhdon duke vënë në dukje zëvendësimin e centrifugave IR1 në Fordo me IR6, duke theksuar se masa do të rrisë me 10 herë pasurimin e uraniumit në vend. Masat e fundit thuhet se janë në përputhje me një ligj të miratuar nga Parlamenti iranian për të kundërshtuar sanksionet e njëanshme të vendosura nga Shtetet e Bashkuara ndaj Teheranit.