Irani: Prania në Siri nuk varet nga pëlqimi i ndonjë pale tjetër

Irani ka deklaruar të shtunën se prania e forcave të tij në Siri është sipas kërkesës së qeverisë siriane dhe në bazë të marrëveshjeve të arritura tashmë dhe nuk varet nga ndonjë marrëveshje tjetër rajonale apo ndërkombëtare.

Zëvendësministri i jashtëm për çështje arabo-afrikane Hosein Xhaberi Ansari i bëri këto deklarata të shtunën në Teheran në margjinat e takimit me të dërguarin e posaçëm të presidentit rus për çështjen e Sirisë, Alexander Lavrentiev. Në pyetjen rreth marrëveshjes midis SHBA dhe Rusisë për vendosjen e armëpushimit në jugperëndim të Sirisë dhe se nëse marrëveshja përfshin praninë e forcave iraniane në rajon, Ansari tha se prania e Iranit në çdo formë apo nivel në krizën siriane ka qenë me kërkesë të qeverisë siriane dhe ekzistojnë tashmë edhe marrëveshje të nënshkruara. Ai tha se prania e forcave të RII në Siri nuk varet nga ndonjë marrëveshje tjetër rajonale apo ndërkombëtare. Ai shtoi se marrëveshja e të tjerëve, nëse ka, në lidhje me Iranin nuk do të kishte rezultat praktik ose efektiv sa i përket pranisë së Iranit.