Ruhani: Sulmet ndaj Sirisë, herezi e turpshme në marrëdhëniet ndërkombëtare

Presidenti iranian z. Hasan Ruhani tha të martën se sulmet mbi Sirinë konsiderohen si një herezi e turpshme në marrëdhëniet ndërkombëtare dhe këshilloi të gjitha palët të jenë të ndjeshme ndaj ndërhyrjeve të paligjshme në zhvillimet rajonale.

Siç njofton agjencia e lajmeve IRNA, në një telefonatë me presidentin turk Rexhep Tajip Erdogan të martën, Ruhani tha se është e domosdoshme që Teherani dhe Ankaraja të vazhdojnë bashkëpunimin dhe konsultimet për të nxitur paqen në rajon. Ai shtoi se Shtetet e Bashkuara, Britania dhe Franca kryen një sulm agresiv kundër Sirisë, duke thënë: "Është një precedent shumë i shëmtuar në marrëdhëniet ndërkombëtare që disa vende të fuqishme dhe luftënxitëse sulmojnë një vend sa herë që duan". Presidenti iranian vuri në dukje qasjen e dyfishtë dhe selektive të fuqive perëndimore ndaj përdorimit të armëve kimike dhe tha se Irani, një nga viktimat më të mëdha të armëve të tilla, gjithmonë dënon përdorimin e armëve kimike nga çdo vend. Ai tha se të gjitha vendet duhet të reagojnë ndaj ndërhyrjeve të paligjshme me çështjet rajonale, duke shtuar: "Kur asgjë nuk është vërtetuar dhe inspektorët e Organizatës për Ndalimin e Armëve Kimike nuk kanë njoftuar rezultatet e hulumtimeve dhe hetimeve të tyre, asnjë vend nuk lejohet të kryejë një veprim ushtarak. " Duke iu referuar një takimi të fundit midis presidentëve të Iranit, Rusisë dhe Turqisë në Ankara, Ruhani tha: "Lufta kundër terrorizmit, përfundimi i luftës në Siri dhe vendosja e sigurisë në rajon janë ndër qëllimet e përbashkëta të të tre vendeve".