Ruhani: SHBA nuk kanë mundur ta izolojnë Iranin

Presidenti iranian Hasan Ruhani theksoi se Shtetet e Bashkuara kanë dështuar në përpjekjet e tyre për të goditur pozitën globale të Iranit dhe për ta izoluar atë, duke shtuar se bota e di mirë se komplotet e armikut nuk mund ta gjunjëzojnë popullin e Iranit.

Ruhani i bëri komentet të enjten para udhëtimit të tij në kryeqytetin azerbajxhanas, Baku, për të marrë pjesë në samitin e 18-të të Lëvizjes së Vendeve të Paangazhuara (NAM). "Amerikanët që në fillim synonin të izolonin Republikën Islamike të Iranit, por me ndihmën e Zotit, pozita e Iranit midis popujve të botës vetëm është forcuar gjithnjë e më shumë," tha Ruhani. Ai e përshkroi Iranin si një vend "kyç dhe me ndikim" në rajon, duke theksuar se sot nuk ka asnjë dyshim në botë që komplotet e armikut, veçanërisht sanksionet e ashpra ekonomike të vendosura nga SHBA ndaj Republikës Islamike, nuk mund ta gjunjëzojnë kombin iranian. Ruhani më tej denoncoi SHBA-të për ndjekjen e qasjeve të njëanshme ndaj vendeve të tjera dhe ndërhyrjen në punët e tyre të brendshme. Duke komentuar udhëtimin e tij në Baku, Presidenti Ruhani tha se ai do të mbajë një fjalim gjatë samitit të NAM dhe do të zhvillojë takime bilaterale me disa krerë të shteteve që marrin pjesë në këtë samit. Presidenti iranian tha se ai do të zhvillojë një takim dypalësh me homologun e tij azer Ilham Aliev sot për të diskutuar çështje me interes të ndërsjellë, përfshirë zbatimin e marrëveshjeve Teheran-Baku.