Anulohet ceremonia e namazit të së premtes në 23 provinca të Iranit
Organizimi i ceremonisë së namazit të së premtes këtë javë është anuluar në disa provinca të Iranit ku është përhapur virusi Korona.
Këshilli për Organizimin e Ceremonisë së Namazit të së Premtes me anë të një deklarate, ka deklaruar se organizimi i ceremonisë së namazit të së premtes këtë javë në qendrat e 23 provincave të Iranit është anuluar me qëllim të parandalimit të përhapjes së virusit Korona.
Sipas kësaj deklarate, ceremonia e namazit të së premtes në qytetet dhe rrethet e tjera në të gjithë Iranit organizohet duke respektuar rregullat e higjienës.
Kejanush Xhahanpur, zëdhënësi i Ministrisë së Shëndetësisë së Iranit, ditën e premte në konferencën për shtyp tha: “Sipas analizave të bëra në lidhje me rastet e dyshuara për korona virus, është konfirmuar se numri i të infektuarve ka shkuar në 388 persona, ndërsa deri më tani për fat të keq si pasojë e infektimit me këtë virus kanë humbur jetën 34 persona në Iran”.
Vlen të theksohet se sipas statistikave të OBSH-së, deri më tani mbi 83000 persona në botë janë infektuar me virusin Korona dhe nga kjo shifër mbi 36000 persona janë përmirësuar, ndërsa kanë humbur jetën mbi 2800 persona.
