Arabia Saudite e angazhuar për një diskutim thelbësor me Iranin

Ministri i Jashtëm i Arabisë Saudite, Princi Faisal bin Farhan Al Saud, tha se vendi i tij është i përkushtuar ndaj dialogut thelbësor me Iranin për adresimin e shqetësimeve të përbashkëta të vendeve të rajonit, duke shtuar se Teherani dhe Riadi planifikojnë të mbajnë një raund tjetër bisedimesh së shpejti.

Në një intervistë me France 24 të publikuar të shtunën, Al Saud tha se katër raundet e mëparshme të bisedimeve midis Iranit dhe Arabisë Saudite kanë qenë "të një natyre eksploruese. Ato kanë qenë të përzemërta, por jo thelbësore". "Ne jemi të përkushtuar për një diskutim thelbësor me Iranin për adresimin e shqetësimeve që kemi ne dhe vendet e tjera në rajon. Kjo do të na lejonte të arrijmë në një marrëdhënie normale... por kjo do të kërkonte të adresojmë të gjitha shqetësimet që kemi të gjithë," shtoi kryediplomati saudit. Ai vuri në dukje se të dy vendet nuk kanë arritur ende ndonjë përfundim thelbësor për bisedimet dypalëshe, por kanë bërë mjaft përparim që do t'u mundësonte të ecin përpara. Princi Faisal tha se një raund i ri bisedimesh nuk është planifikuar ende, por shprehu shpresën se do të fillojë së shpejti, duke shtuar: "Ne jemi të hapur për të." Për vite me radhë, mbretëria saudite ndoqi një politikë të jashtme konfrontuese ndaj Republikës Islamike, por kohët e fundit duket se ka ndryshuar rrugën. Dy vendet e Lindjes së Mesme kanë mbajtur katër raunde bisedimesh që nga prilli, duke përfshirë një takim të parë muajin e kaluar me qeverinë e Presidentit të ri Ebrahim Raisi.