Oxfam: Jemenin e pret katastrofa nëse nuk rinovohet armëpushimi

Grupi ndërkombëtar i bamirësisë Oxfam paralajmëroi se populli i Jemenit mund të përballet me "uri katastrofike" nëse nuk rinovohet një armëpushim që është ndërmjetësuar nga OKB-ja midis palëve ndërluftuese në vend.

Oxfam dha alarmin të martën, një ditë para përfundimit të armëpushimit të ndërmjetësuar nga Kombet e Bashkuara. Armëpushimi, vuri në dukje ky grup, "ka sjellë një rënie të viktimave civile pasi sulmet ajrore dhe luftimet tokësore janë ulur ndjeshëm". Raporti i Oxfam tha se si rezultat i armëpushimit, "fluturimet nga aeroporti i kryeqytetit të Jemenit Sana'a kanë rifilluar dhe anijet me karburant kanë mundur të hyjnë në portin Hudaidah...". Drejtori i organizatës bamirëse në Jemen, Ferran Puig, tha se armëpushimi kishte sjellë një "ndjenjë të vonuar shprese se ne mund të thyejmë ciklin e dhunës dhe vuajtjes në Jemen". “Duhet shfrytëzuar mundësia për të zgjatur armëpushimin dhe për të nxitur një paqe të qëndrueshme nëse duam të shmangim rrezikun që miliona jemenas të vuajnë nga uria akute”, tha Puig.