Hezbollah: Izraeli të eliminohet nëse përpiqet të dëbojë palestinezët nga Gaza

Një zyrtar i lartë i Hezbollahut është zotuar se Izraeli "do të eliminohet një herë e përgjithmonë" nëse përpiqet të dëbojë palestinezët nga Rripi i Gazës dhe se është thelbësore të sulmohen interesat e SHBA-së në mënyrë që të ndalet agresioni.

Sheikh Naim Kasem, i cili ka shërbyer si zëvendëssekretar i përgjithshëm i Hezbollahut që nga viti 1991, i bëri këto komente në një intervistë me të përditshmen spanjolle El Mundo.

"Nëse Izraeli vendos të zgjerojë agresionin, ai do të gërmojë varrin e tij dhe do të ofrojë një mundësi të mirë për t'u eliminuar një herë e përgjithmonë," tha ai, duke iu referuar propozimeve të instituteve izraelite për dëbimin e palestinezëve nga Gaza, të cilat janë publikuar nga mediat izraelite.

I pyetur për të komentuar mbi një kërcënim të fundit nga një ministër izraelit se Izraeli mund të vendosë të godasë me armë bërthamore Gazën dhe nëse një sulm i tillë bërthamor mund të synojë edhe Libanin, Naim Kasem tha se ata nuk kanë frikë nga armët bërthamore izraelite.

“Nëse Izraeli përdor armë bërthamore, ai do të vrasë izraelitët para se të na vrasë ne. Ky është një territor shumë i vogël. Në çdo rast, ne nuk kemi frikë nga armët bërthamore. Deklaratat e ministrit izraelit janë shembull i arrogancës së tij. Perëndimi duhet të na tregojë se çfarë mendon për një ministër izraelit që sugjeron përdorimin e armëve bërthamore.”

Ai tha se Hezbollahu përpiqet të detyrojë Izraelin të ndalojë sulmet e tij ndaj civilëve në Rripin e Gazës, duke shtuar se ekziston një mundësi reale e zgjerimit të luftës nëse Izraeli refuzon të ndalojë sulmet e tij.

“Numri i civilëve të vrarë nga Izraeli rritet çdo ditë. Ne kemi një plan për t'iu përgjigjur këtyre llojeve të sulmeve dhe për të detyruar Izraelin të ndalet. Por ky është një vendim që do të merret në fushën e betejës, "komentoi më tej ai.

“Përsa i përket përhapjes së luftës, kjo mundësi ekziston... Nëse na sulmojnë, ne do të duhet të mbrohemi dhe do të përdorim të gjithë fuqinë tonë. Ne nuk kemi frikë nga kërcënimet izraelite. Jemi të bindur se do të fitojmë”, tha ai.

Ai tha se Hezbollahu është në një pozicion shumë më të mirë krahasuar me vitin 2006 kur luftoi kundër regjimit sionist për 33 ditë dhe se depot e tij janë plot me armë.