Zelensky shkarkon të gjithë shefat rajonalë të rekrutimit

Presidenti ukrainas Volodymyr Zelensky njoftoi të premten shkarkimin e krerëve të të gjitha qendrave rajonale të rekrutimit ushtarak, mes shqetësimeve për korrupsion.

Zelensky tha se një rishikim i qendrave të rekrutimit të Ukrainës zbuloi shenja të abuzimit profesional, duke filluar nga pasurimi i paligjshëm deri te transportimi i burrave të kualifikuar për rekrutim përtej kufirit, pavarësisht një ndalimi gjatë luftës. “Ky sistem duhet të drejtohet nga njerëz që e dinë saktësisht se çfarë është lufta dhe pse ryshfeti gjatë luftës është tradhti”, citohet të ketë thënë ai në një deklaratë. Zelensky tha se gjenerali i lartë Valery Zaluzhny do të jetë përgjegjës për zbatimin e vendimit dhe se kandidatët e rinj për postet do të verifikohen fillimisht nga shërbimi i sigurisë së brendshme të Ukrainës, SBU. Ukraina është përballur me sfida rekrutimi ndërsa lufta me Rusinë po intensifikohet dhe ushtria ukrainase goditet herë pas here nga skandale që zbulojnë korrupsion ose taktika të dyshimta rekrutimi. Vitin e kaluar, Zelensky shkarkoi kreun e shërbimit të brendshëm të sigurisë së vendit, SBU, dhe prokurorin e përgjithshëm, për atë që ai tha se ishin duke bashkëpunuar me Rusinë për çështjet e sigurisë dhe ushtarake. Ai pretendoi se më shumë se 60 zyrtarë nga shërbimi i sigurisë SBU dhe zyra e prokurorit kanë spiunuar për Rusinë.