Instituti amerikan pohon: Jemeni shkatërroi arsenalin amerikan

Pars Today - Një institut amerikan pranoi se sulmi i pafrytshëm në Jemen zbrazi arsenalin amerikan.

Sipas raportit të Pars Today, të cituar nga agjencia iraniane e lajmeve IRNA, instituti "American Enterprise" paralajmëroi për reduktimin e rezervave amerikane të municioneve pas sulmeve të pafrytshme të këtij vendi në Jemen.

Mackenzie Eaglen, një eksperte e mbrojtjes dhe ushtrisë amerikane, tha në një raport për këtë organizatë kërkimore se operacionet e vazhdueshme ushtarake i kanë sfiduar Shtetet e Bashkuara dhe e kanë vendosur Uashingtonin në një pozicion ku nuk është në gjendje të zhvillojë me sukses një betejë intensive dhe afatgjatë.

Në këtë drejtim, admirali James Kilby, shefi në detyrë i operacioneve detare, theksoi para Komitetit të Buxhetit të Dhomës së Përfaqësuesve se operacioni kundër lëvizjes Ansarullah të Jemenit e ka tendosur rëndë industrinë amerikane të prodhimit të municioneve.

Më herët, New York Times zbuloi rënien e ndjeshme të rezervave të municioneve të SHBA-së. Sipas gazetës amerikane, vetëm në 30 ditë të Operacionit Roughrider, ushtria amerikane sulmoi më shumë se 1000 objektiva, me një kosto "të jashtëzakonshme" prej më shumë se 1 miliard dollarësh.

Think-tank-u "Defense Priorities", një grup ekspertësh me seli në Uashington, vlerëson se Shtetet e Bashkuara të Amerikës kanë shpenzuar më shumë se 7 miliardë dollarë duke bombarduar Jemenin në pak më shumë se dy vjet nën presidencën e Joe Bidenit dhe presidencën aktuale të Trumpit.

Gjeneral-brigade Muxhib Shamsan, një ekspert ushtarak jemenas, tha gjithashtu së fundmi: “Aftësia e Jemenit për të zbuluar avionët luftëtarakë amerikanë të fshehtë (F-35) me mjete të thjeshta dhe aftësi tradicionale është në vetvete një fyerje për strategjinë ushtarake të armikut dhe për mënyrën amerikane të të menduarit”.

Duke theksuar se mesazhi i Jemenit ka shkuar përtej çështjes së konfrontimit me amerikanët dhe ka arritur te sionistët, ai deklaroi: “Mjetet që sollën amerikanët për të reaguar dhe ndikuar në operacionet jemenase, e kanë humbur efikasitetin e tyre”.