واریز 800 هزار دلار به حساب سفارت افغانستان درتاجیکستان

دولت طالبان به اشتباه 800 هزار دلار به حساب سفارت افغانستان در تاجیکستان واریز کرد.

به گزارش رادیو تاجیکی صدای خراسان به نقل از«اوستا» «اشرف غنی» رئیس جمهور وقت افغانستان در سفر خود به تاجیکستان در پایان ماه مارس سال 2021 میلادی وعده داده بود مدرسه‌ای برای مهاجران افغان در شهر وحدت می‌سازد.

غنی بعد از برگشت به کابل وزارت دارایی کشورش را به تخصیص حدود 800 هزار دلار (بنابر اطلاعات دیگر 785.6 هزار دلار) برای ساخت مدرسه در شهر وحدت تاجیکستان موظف کرد.

این مبلغ را وزارت دارایی افغانستان باید به حساب سفارت افغانستان در تاجیکستان واریز می‌کرد، اما در آگوست سال 2021 وضعیت در افغانستان به کلی تغییر کردغنی افغانستان را ترک کرد و طالبان قدرت را به دست گرفت.

این پول برای انتقال در حساب‌های وزرات دارایی در کابل باقی مانده بود و مقامات جدید وزارت دارایی به نمایندگی از طالبان این وجوه را به سفارت افغانستان در تاجیکستان منتقل کردند.

در پایان نوامبر، وزارت امورخارجه طالبان با ارسال نامه‌ای به سفارت افغانستان درتاجیکستان خواستار بازگرداندن این مبلغ شد.

سفارت افغانستان در تاجیکستان تایید کرده که چندی قبل مبلغ هنگفتی  به حساب این سفارتخانه واریز شده بود که برای نیازهای سفارت هزینه شده است.

مسئولان سفارتخانه اعلام کردند، ما نمی‌توانیم این پول را به طالبان برگردانیم زیرا طالبان را نه تنها ما بلکه کل جهان هنوز به رسمیت نمی‌شناسد.