مقامات ازبکستان: هواپیماهای حکومت پیشین افغانستان را به طالبان نمی‌دهیم
مقامات ازبکستانی می‌گویند که ده‌ها هواپیمای ارتش حکومت پیشین افغانستان را که پس از سقوط کابل به آن کشور انتقال داده شده، به حکومت طالبان تحویل نمی‌دهد.
به گزارش رادیو تاجیکی صدای خراسان،عصمت‌الله ارگاشف، نماینده ویژه ازبکستان در امور افغانستان گفت :این هواپیماها متعلق به امریکا است و به کابل باز نخواهند گشت.
- او افزوده است: «دولت ایالات متحده هزینه هواپیماها را پرداخت کرده است.
- عصمت‌الله ارگاشف اظهار کرد ما معتقدیم که این کاملاً به واشینگتن بستگی دارد که با آنها چه می‌کند.
- دیپلمات ازبکستانی گفت: ازبکستان این تجهیزات نظامی را در توافق با ایالات متحده نگه داشته است.
مقام‌های دفاعی امریکا نیزتایید کرده‌اند که ازبکستان و تاجیکستان هیچ برنامه‌ای برای تحویل هواپیماهای حکومت پیشین افغانستان به طالبان ندارند.
راب لودویک، یکی از سخنگویان وزارت دفاع امریکا هم گفت: ۴۶فروند هواپیمای افغانستان در ازبکستان و ۱۸فروند در تاجیکستان است.
به‌گفته‌ی او، این هواپیماها شامل بالگردهایMi-17 UH-60 و همچنین هواپیمای بال ثابت PC-12، C-208، AC-208 و A-29 است.
اما طالبان این تجهیزات را دارایی عمومی مردم افغانستان می‌داند و بارها از حکومت‌های تاجیکستان و ازبکستان خواسته‌اند که آنها را بازگردانند.
ملا محمد یعقوب، سرپرست وزارت دفاع طالبان به تاجیکستان و ازبکستان هشدار داده و گفته بود " که هیچ کشوری حق ندارد که هواپیماهای افغانستان را نزد خود نگه دارد یا از آن استفاده کند: «با بسیار احترام از آنان تقاضا می‌کنم که صبر ما را نه آزمایند و ما را مجبور نسازند که تا حد توان دست به عمل مشابه بزنیم.»"
