Pars Today

مقام تاجیک، ارتباط و همکاری گروه‌های تروریستی تاجیکستان و افغانستان را تایید کرد.

به قدرت رسیدن طالبان در افغانستان در نیمه اوت 2021 با افزایش نگرانی ها از قدرت گرفتن گروه های تروریستی در این کشور همراه بود. اما طالبان از همان ابتدا به جامعه بین الملل به ویژه همسایگان افغانستان از جمله تاجیکستان، اطمینان داد که "کابل هرگز اجازه نخواهد داد که از خاک افغانستان علیه کشور دیگری سوء استفاده شود.

ذبیح الله مجاهد سخنگوی طالبان چندی پیش در واکنش به ابراز نگرانی های مقامات تاجیک گفته بود، "نگرانی تاجیکستان بی‌جاست."

به گزارش روز شنبه خبرگزاری ایرنا، رئیس مطالعات استراتژیک وزارت خارجه تاجیکستان گفت، گروه‌های تروریستی در منطقه «بدخشان» با گروه‌های تروریستی در افغانستان ارتباط دارند.

شرف رحیمی افزود، در حال حاضر عواقب فعالیت‌ گروه‌های تروریستی در افغانستان را در امتداد مرزهای کشور خود احساس می‌کنیم.

این محقق تاجیک با اشاره به بازداشت اعضای شماری از گروه‌های تروریستی توسط نیروهای امنیتی تاجیکستان در امتداد مرز با افغانستان تصریح کرد، این دستگیری ها به روشنی موید ارتباط نزدیک میان گروه‌های تروریستی در بدخشان، با تروریست‌ها و جنایتکاران مواد مخدر در افغانستان است.

رحیمی به روز شدن و ابداع روش های تازه توسط تروریست‌های فعال در افغانستان را تایید و اذعان کرد، "عناصر تروریستی مقدار زیادی سلاح‌های سبک و سنگین و تجهیزات نظامی در انبارهای مهمات خود دارند."

گفتنی است، چند حمله تروریستی به همسایگان افغانستان از داخل خاک این کشور توسط داعشی ها، توانایی طالبان در تحقق وعده های داده شده به کشورهایی همچون تاجیکستان را زیر سوال برده است.