مقامات تاجیکستان : منافع ملی ملاک تصمیم‌گیری‌در مورد افغانستان است
وزارت امور خارجه تاجیکستان در مورد علت حمایت نکردن از بیانیه نشست «قازان» در مورد افغانستان اعلام کرد منافع ملی ملاک تصمیم گیری‌های این کشور در مسئله افغانستان است.
به گزارش رادیو تاجیکی صدای خراسان،نهاد دیپلماتیک تاجیکستان ضمن اعلام این مطلب از اظهار نظر در مورد سخنان «ضمیر کابل‌اف» نماینده ویژه رئیس جمهور روسیه در امور افغانستان که پیش از این جزئیات روند مذاکرات در مورد بیانیه نهایی نشست از جمله موضع طرف تاجیکی در مورد عدم حمایت از برخی مفاد این سند را فاش کرده بود، خودداری کرد.
وزارت امور خارجه تاجیکستان تنها به دیپلمات بلندپایه روس توصیه کرده است که آداب دیپلماتیک را رعایت کند.
در نشست 29 سپتامبر نماینده‌های ویژه وزارتخانه‌های امور خارجه 15 کشور جهان از جمله روسیه، چین، هند، قزاقستان، قطر، قرقیزستان، تاجیکستان، ترکمنستان، عربستان سعودی، ترکیه و امارات متحده عربی شرکت و وضعیت کنونی در افغانستان، مصالحه بین‌الافغانی، تضمین امنیت منطقه‌ای و بازسازی این کشور پس از جنگ را بررسی کردند.
افغانستان را در این نشست «امیرخان متکی»، وزیر امور خارجه دولت طالبان نمایندگی کرد.
