دولت کابل پناهنده تاجیک را اخراج می کند

مقامات امنیتی افغان یک خانواده پناهجوی تاجیکستانی در کابل را پس از 20 سال زندگی در افغانستان تهدید به اخراج از این کشور کرده اند.

مقامت امنیتی افغانستان امیر حمزه حلیم اف پناهجوی تاجیک را تهدید کرده اند که وی و خانواده اش را از خاک این کشور اخراج یا به سفارت تاجیکستان  تسلیم خواهند کرد.

امیر حمزه حلیم اف که از 20 سال پیش در افغانستان زندگی می کند در گفت وگو با رادیو تاجیکی صدای خراسان گفت: علت تصمیم مقامات افغان این است که وی مدارک شناسایی ندارد.

در پی این تصمیم مقامات افغان، حلیم اف به نمایندگی سازمان ملل در کابل شکایت کرده ، اما شکایت او نتیجه ای نداشته است.

حلیم اف می گوید: شتابزدگی هنگام فرار از تاجیکستان سبب شد تا وی نتواند مدارک شناسایی خود را بردارد و امروز نبود این مدارک بر مشکلات وی در افغانستان افزوده  است.

این شهروند تاجیکستانی بارها از دولت افغانستان درخواست پناهندگی یا شهروندی کرده است، اما هر بار درخواست وی از سوی مقامات افغان رد شده است .

به گفته حلیم اف ، وی اخیرا در نامه ای به رییس جمهوری افغانستان درخواست پناهندگی یا صدور مجوز برای سفر به کشوری دیگر کرده ، اما وزارت مهاجرت افغانستان به بهانه نبود قانون پناهندگی در این کشور به درخواست وی رسیدگی نکرده است.

امیر حمزه  حلیم اف شهروند تاجیکستانی که در زمان درگیری های داخلی کشورش (1992-1997) به افغانستان پناهنده شد ، بعد از امضای قرارداد صلح در سال 1997 در اعتراض  به صلح تاجیکان به تاجیکستان بازنگشت.