کشته شدن هشت جنگجوی تاجیکستانی در شمال افغانستان

مقامات نظامی افغانستان از کشته شدن هشت جنگجوی تاجیکستانی در عملیات ویژه نیروهای دولتی علیه گروه طالبان در ناحیه دشت ارچی از توابع ولایت قندوز در نردیکی مرز این کشور با تاجیکستان خبر داده‌اند.

به گزارش رادیو تاجیکی صدای خراسان به نقل از سایت اخبار، دولت وزیری سخنگوی وزارت دفاع افغانستان گفته است که در عملیات شبانه با استفاده از پهپادها در این منطقه یکی از فرماندهان گروه طالبان و 14 عضو این گروه کشته شده اند که هشت نفر از این افراد شهروندان تاجیکستان بوده اند.

این در حالی است که ژنرال سید قربان موسوی فرمانده تیپ 20 ارتش افغانستان مستقر در ولایت قندوز گفته است در این عملیات اسدالله مظلوم‌یار معاون خودخوانده والی طالبان در قندوز و 12 عضو این گروه کشته شده‌اند که شش نفر از آنان اتباع خارجی می‌باشند.

گروه طالبان تا به حال درباره این خبر ابراز نظر نکرده است.

مقامات امنیتی افغانستان می‌گویند طی دو سال اخیر گروه‌های افراطی حرکت اسلامی ازبکستان، انصارالله و جهاد اسلامی که شهروندان کشورهای آسیای مرکزی عضو آن هستند با استقرار در شمال این کشور در نزدیکی مرزهای تاجیکستان، ازبکستان و ترکمنستان قصد ورود به داخل این کشورها را دارند.

این مقامات معتقدند که از هفت ناحیه ولایت قندوز تنها سه ناحیه در کنترل حکومت است و چهار ناحیه دیگر تحت تسلط مخالفان قرار گرفته است.

مقامات تاجیکستان و روسیه در سفر روزهای 27  و 28 فوریه امسال ولادیمیر پوتین رییس جمهوری روسیه به دوشنبه درباره حفاظت از مرز مشترک نزدیک به یک هزار و 400 کیلومتری تاجیکستان و افغانستان با حضور نظامیان روس مستقر در پایگاه 201 و نیروهای مسلح تاجیکستان، به توافق رسیدند.