معمای بسته شدن مرز تاجیکستان و افغانستان

در حالی که مقامات مرزبانی تاجیکستان بسته شدن یک گذرگاه و پنج پل ارتباطی با افغانستان را رد می کنند، منابع دولتی افغانستان مدعی اند که واقعا هم برخی مناطق مرزی این دو کشور به طور یکجانبه از سوی دوشنبه بسته شده است.

به گزارش رادیو تاجیکی صدای خراسان به نقل از تاپ تی جی، یک مقام مسول دولتی تاجیکستان بدون افشای نام خویش با تایید بسته شدن برخی مناطق مرزی با افغانستان، دلیل این اقدام را " بی اعتمادی به مرزبانان افغانستانی " اعلام کرده است.

وی گفته است که پس ازکشته شدن سرهنگ " خیرالدین ادهم اف " فرمانده پاسگاه مرزی تاجیکستان درناحیه شمس الدین شاهین درشب 2 دسامبر به دست یک گروه از قاچاقچیان مواد مخدرافغانی اکنون مسیراصلی ارتباطی دو کشور در بندرشیرخان مسدود شده است. این مقام دولتی تاجیکستان گفته است که به احتمال زیاد این گروه قاچاقچیان مواد مخدر افغان با همکاری مرزبانان این کشور وارد قلمرو تاجیکستان شده است.

از سوی دیگر احمد فیصل بیکزاد والی بدخشان افغانستان تاکید کرده است که بسته شدن راه ارتباطی بندرشیرخان ازسوی تاجیکستان برای بازرگانان این کشورمشکل زیاد ایجاد می‌کند و مقامات دولت کابل تلاش دارند که عاملان قتل فرمانده پاسگاه مرزی تاجیکستان را بازداشت ومجازات کنند.

ساکنان ولایت بدخشان افغانستان در فصل سرما به دلیل کوهستانی بودن این منطقه و بارش برف زیاد ارتباطی با مرکز این کشور ندارند و سوخت و مواد غذایی مورد نیاز خویش را از تاجیکستان وارد می کنند.