درخواست والدین جوان تاجیک عضو داعش برای بازگرداندن وی از افغانستان

دادستان شهر کولاب در ولایت ختلان تاجیکستان گفت، والدین یک جوان 18 ساله ساکن این ولایت درخواست کرده اند فرزندشان که در اردوگاه آموزشی گروه تروریستی داعش در ولایت ننگرهار در شرق افغانستان است، بازگردانده شود.

به گزارش رادیو تاجیکی صدای خراسان به نقل از سایت کانیوز، به گفته" خوشوقت مشرب زاده "، این جوان به اسم " شادیجان بای اف" که از سال 2016 در روسیه فعالیت می کرد، به ترکیه و از این کشور نیز به افغانستان رفته است.

" فیروزه محمد رحیم اوا " مادر" شادیجان بای اف " گفته است، پسرش تا نوامبر سال 2017 در یکی از رستوران های شهر مسکو کار می کرد و قرار بود پس از دریافت حقوق به تاجیکستان بازگردد.

 او ادامه داد، مبلغان گروه تروریستی داعش با پاره کردن گذرنامه تاجیکی شادیجان، وی را با شناسنامه جعلی به افغانستان منتقل کرده اند.

 به گفته وی پسرش طی تماس کوتاه تلفنی از ولایت ننگرهای افغانستان، خبر حضور اجباری خود در یک اردوگاه آموزشی گروه تروریستی داعش را به آنها داده است.

 مادر این جوان تاجیک گفت، وی تاکید کرده از این کار پشیمان است و نمی داند چگونه از این اردوگاه فرار کند.

 از این رو والدین وی از مقامات قضایی تاجیکستان درخواست کرده اند برای بازگردادن " شادیجان بای اف " از افغانستان به آنها کمک کنند.

 " خوشوقت مشرب زاده " دادستان شهر کولاب تاکید کرده است، در حال حاضر علیه این جوان 18 ساله به اتهام عضو شدن در گروه تروریستی، پرونده جنایی تشکیل شده است و در صورت بازگشت وی به تاجیکستان و اثبات مقصر نبودنش می تواند مورد عفو قرار گیرد.