بازداشت اعضای یک گروه سازمان یافته جنایی در تاجیکستان

وزارت امور داخله تاجیکستان از بازداشت هفت عضو یک گروه سازمان یافته جنایی که متهم به قتل و سرقت اموال شهروندان با استفاده از اسلحه هستند، خبرداد.

به گزارش رادیو تاجیکی صدای خراسان به نقل از سایت اخبار، وزارت امور داخله تاجیکستان با پخش فیلم مستندی با عنوان " پیوندان اهریمن " تاکید کرده است، اخیرا این افراد که چند سالی تحت پیگرد بودند، در راه دوشنبه -  قرغان تپه بازداشت شده اند.

در این فیلم بیان شده است، دو نفر از اعضای این گروه جنایی قبلا به دلیل ارتکاب جنایات سنگین در روسیه محکوم به زندان شده بودند ولی پس از آزادی و استرداد به تاجیکستان، اقدام به سرقت اموال مردم و قتل تعدادی از شهروندان کردند.

آنان به اقداماتی همچون حمله به منازل مسکونی ساکنان ناحیه های رودکی، واسع، کانی بادام  و باباجان غفوراف و شکنجه و قتل ساکنان و سرقت اموال این افراد اعتراف کرده اند. 

وزارت امورداخله تاجیکستان در این مستند تاکید کرده است، اعضای این گروه سازمان یافته جنایی از قبل با شناسایی منازل مسکونی شهروندان بیشتر در شب به خانه های آنان حمله کرده و با استفاده از اسلحه اقدام به شکنجه ساکنان منزل و سرقت وجه نقد و اموال آنان می کردند.