یک مسوول تاجیک: «دوشنبه» هیچ ارتباطی با طالبان ندارد

سخنگوی بخش مرزبانی کمیته امنیت ملی تاجیکستان در واکنش به سخنان یک نماینده پارلمان افغانستان، هرنوع ارتباط کشورش با «طالبان» را تکذیب کرد.

به گزارش رادیو تاجیکی صدای خراسان به نقل از خبرگزاری فارس، «محمد الوغخاجه اف» گفت: اطلاعات منتشر شده از سوی نماینده پارلمان افغانستان، بی پایه و دروغ آشکار است و دوشنبه هیچ ارتباطی با «طالبان» نداشته و ندارد.

وی طالبان را یک سازمان تروریستی شناخته شده در تاجیکستان معرفی کرد و افزود: هرگونه تماس با آن از سوی قوانین این کشور ممنوع شده است.

چند روزی قبل «انجنر کمال» نماینده پارلمان افغانستان از استان قندوز، در سخنانی از شبکه تلویزیونی «آشنا» افغانستان گفته بود، نیروهای طالبان زخمی شده در درگیری با نیروهای دولتی این کشور، در بیمارستان های تاجیکستان درمان می شوند.

این نماینده پارلمان افغانستان همچنین مدعی شد، امروزه طالبان با کشورهای همسایه، منطقه و جامعه بین المللی ارتباطات نزدیک و دوستانه برقرار کرده است.