استقرار نزدیک به هفت هزار جنگجوی طالبان در مرز با تاجیکستان

فرمانده نیروی مرزبانی تاجیکستان وابسته به کمیته دولتی امنیت ملی این کشور از استقرار نزدیک به هفت هزار جنگجوی گروه طالبان در مرزهای شمال افغانستان با تاجیکستان خبر داد.

به گزارش رادیو تاجیکی صدای خراسان به نقل از سامانه تاپ تی جی، ژنرال رجب علی رحمان علی این مطلب را طی سخنانی در مراسم پانزدهمین سالگرد اجرایی شدن برنامه مدیریت مرزهای کشورهای آسیای مرکزی با همکاری اتحادیه اروپا اعلام کرد.

وی با تاکید بر انتقال پایگاه های گروه طالبان از جنوب افغانستان به نزدیکی مرزهای مشترک جمهوری های آسیای مرکزی، همکاری بیشتر ادارات امنیتی  و انتظامی این کشورها را برای مقابله با تحرکات گروههای تروریستی مستقر در این منطقه خواستار شد.

گروه طالبان در حال حاضر 29 پایگاه آموزشی خود را از جنوب افغانستان به شمال این کشور و در نزدیکی مرزهای تاجیکستان و دیگر کشورهای آسیای مرکزی منتقل کرده است. مقامات دولت کابل می گویند تعداد زیادی از جنگجویان کشورهای آسیای مرکزی نیز در صفوف این گروه حضوردارند.

به گفته فرمانده نیروی مرزبانی تاجیکستان اکثر پایگاههای گروه طالبان در ولایت های بدخشان، تخار، قندوز و بلخ فعالیت می کنند که در نزدیکی مرز مشترک افغانستان با تاجیکستان واقع شده اند.

در این نشست تاکید شد که تاجیکستان طی 15 سال اجرایی شدن برنامه مدیریت مرزهای کشورهای آسیای مرکزی، از اتحادیه اروپا نزدیک به 43 میلیون  دلار کمک مالی دریافت کرده که برای ساخت و تجهیز ساختن پاسگاه های جدید مرزی مورد استفاده قرارگرفته است.