قاچاقچیان مواد مخدر؛ مسوول ناآرامی مرز افغانستان و تاجیکستان

رییس ناحیه فرخار در مرز مشترک تاجیکستان و افغانستان می‌گوید اوضاع این منطقه را فعالیت گروه‌های قاچاقچیان مواد مخدر افغانستانی ناآرام می‌کند.

به گزارش رادیو تاجیکی صدای خراسان به نقل از خبرگزاری روسی ریانووستی، سلیمان ولی زاده با اشاره به حمله افراد مسلح به محیط بانان این ناحیه که موجب کشته شدن دوتن وزخمی شدن یک نفر از آنان گردید، این اقدام را کارگروه‌های قاچاقچیان مواد مخدر افغانی عنوان کرد.   

قبلا مقامات امنیتی تاجیکستان اعلام کرده بودند که در پی حمله گروه طالبان به خودرو محیط بانان تاجیک در ناحیه فرخار در مرز این کشور با ولایت تخار افغانستان دو محیطبان کشته و یک نفر دیگر زخمی شده است.

اما گروه طالبان با انتشار بیانیه‌ای دست داشتن اعضای خود در این حادثه را تکذیب و اعلام کرده است که مرزبانان تاجیکستان با قاچاقچیان مواد مخدر درگیر شده‌اند.

رییس ناحیه فرخار معتقد است که اکثر درگیری‌ها در مرز این ناحیه با افغانستان ناشی از تحرکات گروه‌های قاچاقچی مواد مخدر می‌باشد که تلاش می‌کنند وارد قلمرو تاجیکستان شوند.

از سوی دیگر یک کارمند کمیته دولتی امنیت ملی تاجیکستان بدون افشای نام خود به خبرگزاری روسی ریانووستی گفته است که جست‌وجوی سه روزه نیروهای مرزبانی تاجیک برای پیدا کردن گروه مسلح مهاجم به محیط بانان این کشور در مناطق جنگلی ناحیه فرخار با ولایت تخار افغانستان بدون نتیجه بوده و به احتمال زیاد این افراد مسلح شبانه به داخل خاک افغانستان فرار کرده‌اند.