ضرب الاجل یک ماهه رحمان به مقامات ولایت بدخشان

رییس جمهوری تاجیکستان در پایان سفر پنج روزه خود به ولایت بدخشان، به مسوولان یک ماه مهلت داد تا نظم و امنیت عمومی را در این منطقه برقرار کنند.

به گزارش رادیو تاجیکی صدای خراسان به نقل از اسپوتنیک، «امامعلی رحمان» در این دیدار از «شادی خان جمشید» رییس ولایت بدخشان، «رمضان رحیم زاده» وزیر امور داخله و «سید مومن یتیم اف» رییس کمیته دولتی امنیت ملی تاجیکستان خواسته است، به کمک نیروهای انتظامی و امنیتی اعزامی از دوشنبه، نظم و امنیت عمومی را برقرار کنند.

وی تهدید کرده است، در صورت ناتوانی در اجرای این دستور، مسوولان ولایت بدخشان و ادارات انتظامی و امنیتی را از سمت های خود برکنار می کند.

رییس جمهوری تاجیکستان تاکید کرده است، باید به خودسری چند تن از افراد مسلح که امنیت عمومی در ولایت بدخشان را به هم می زنند و مانع فعالیت منظم مقامات حکومتی می شوند، پایان داد.

وی گفته است، طی این یک ماه باید قلمرو ولایت بدخشان را از وجود گروه های سازمان یافته جنایی، قاچاقچیان مواد مخدر و افراد مسلح پاکسازی کنند.

تنها پس از پاکسازی کامل این ولایت از گروه های یاد شده، نیروهای ویژه امنیتی و انتظامی اعزامی از دوشنبه می توانند به مقرهای استقرار دایم خود بازگردند.

رحمان گفته است، درصورت ناکامی در این برنامه، مسوولان حکومتی ولایت بدخشان برکنار خواهند شد.