افزایش کشت خشخاش در نزدیکی مرزهای تاجیکستان

یک سازمان غیر دولتی افغانستان از افزایش کشت خشخاش در ولایت های نزدیک به مرز تاجیکستان خبر داد.

به گزارش رادیو تاجیکی صدای خراسان به نقل از ایرنا، سازمان غیردولتی "خط نو"  در افغانستان با اشاره به نقش پر رنگ طالبان در کشت خشخاش افغانستان  اعلام کرد  کشت این ماده مخدر در ولایت های نزدیک به مرز تاجیکستان افزایش یافته است.

«محمد قادر مصباح» نماینده سازمان غیردولتی خط نو گفته است: کشاورزان 21 هزار هکتار از زمین های کشاورزی را در ولایت بلخ به کشت خشخاش اختصاص داده اند که این کار به دستور گروه های مخالفان دولت از جمله طالبان و دیگر گروه های تروریستی انجام شده است.

بلخ یکی از ولایت های نزدیک به مرز تاجیکستان بوده و داد و ستد این ولایت با تاجیکستان زیاد است.

نماینده خط نو می ‌گوید: شورشیان طالبان هزینه کشت خشخاش را حتی پیش از برداشت این محصول به کشاورزان پرداخته اند و این موضوع دلیل افزایش کشت این ماده مخدر در افغانستان شده است.

مقامات امنیتی ولایت بلخ  هم کشت خشخاش در هزاران هکتار از زمین های این ولایت را تایید می ‌کنند و می گویند این کشتزارها در مناطق تحت نظر طالبان است.

پیش از این خشخاش عمدتا در ولایت های جنوبی قندهار و ننگرهار افغانستان کشت می‌ شد، اما گسترش کشت آن  به سمت شمال می تواند موجب نگرانی مقامات تاجیکستان شود.

مقامات رسمی تاجیکستان می ‌گویند: افزایش کشت خشخاش و تولید مخدرهایی همچون تریاک و هروئین باعث ایجاد دردسرهایی برای تاجیکستان نیز شده است زیرا بخشی از مواد مخدر افغانستان از خاک تاجیکستان می گذرد تا به روسیه و اروپا برسد.

تنها در 9 ماه از سال 2018 ، بیش از 20 درگیری مسلحانه با قاچاقچیان افغانستان در مرز تاجیکستان و افغانستان صورت گرفت و 11 تن در این درگیری ها کشته شدند.