آزادی پنج ساکن ولایت بدخشان تاجیکستان از بازداشت پلیس افغانستان
پنج ساکن ولایت بدخشان تاجیکستان که کارمندان کمیته وضعیت اضطراری این منطقه می‌باشند، پس از چند روز از بازداشت پلیس ناحیه اشکاشیم افغانستان آزاد شده اند.
به گزارش رادیو تاجیکی صدای خراسان به نقل از سامانه اخبار آسیای مرکزی، این پنج نفر در حال جست و جوی جسد یک ساکن غرق شده شهر خاروغ مرکز ولایت بدخشان تاجیکستان در رودخانه پنج بودند که به دست پلیس افغانستان بازداشت و اکنون آزاد شده اند.
مقامات ولایت بدخشان تاجیکستان با تایید خبر آزادی این پنج کارمند کمیته وضعیت اضطراری این منطقه گفته اند که آنان به مدت 14 روز قرنطینه خواهند شد تا از مبتلا نشدن این افراد به ویروس کرونا در زمان بازداشتشان در افغانستان اطمینان حاصل شود.
شرط پلیس ولایت بدخشان افغانستان برای آزادی این کارمندان کمیته وضعیت اضطراری ولایت بدخشان تاجیکستان روشن نیست.
قبلا مقامات انتظامی و مرزبانی افغانستان برای آزادی اتباع تاجیکستان، اقدام مشابه تاجیکها برای رهایی قاچاقچیان یا اتباع بازداشت شده این کشور در تاجیکستان را به عنوان شرط مطرح می‌کردند.
قبلا مقامات ولایت بدخشان تاجیکستان نگران بودند که این پنج نفر به دست گروه طالبان گرفتار شده باشند که اکنون در اکثر از مناطق مرز مشترک با افغانستان حضور دارند.
