اوضاع افغانستان محور گفت‌وگوی رحمان و غنی
رییسان جمهور تاجیکستان و افغانستان در تماسی تلفنی درباره روابط دوجانبه و منطقه‌ای گفت‌وگو و تبادل نظر کردند.
به گزارش رادیو تاجیکی صدای خراسان به نقل از سرویس مطبوعاتی ریاست جمهوری تاجیکستان، امامعلی رحمان و اشرف غنی در این تماس تلفنی بر اهمیت همکاری‌های دوجانبه تاجیکستان و افغانستان در زمینه‌های اقتصادی، تجاری، انرژی، حمل‌ونقل، آموزشی و فرهنگی تاکید کردند.
رحمان و غنی توسعه روابط متقابل در بخش‌های مختلف سیاسی و اقتصادی را اولویت سیاست خارجی کشورهای خود عنوان کردند.
رییسان جمهور تاجیکستان و افغانستان اجرایی شدن پروژه‌های منطقه‌ای و بین‌المللی در زمینه‌های مختلف و به ویژه طرح های انرژی نظیر «کاسا 1000» را مهم ارزیابی کردند.
طرفین همچنین موضوعات همکاری‌های دوجانبه، منطقه‌ای و بین‌المللی در زمینه‌های امنیتی، تحکیم مرزها، مبارزه علیه تروریسم و افراط‌گرایی، جنایات سازمان یافته فراملی و گردش غیرقانونی مواد مخدر تبادل نظر کردند.
رحمان و غنی در مورد سفر گروه کاری دولت افغانستان به تاجیکستان برای بررسی توسعه و گسترش روابط دوجانبه به توافق رسیدند.
در پایان این تماس تلفنی، رییس جمهور تاجیکستان برای مردم کشور دوست و همسایه افغانستان صلح آرامش و پیشرفت و شکوفایی درخواست و همتای افغان وی نیز برای مردم کشور برادر تاجیکستان موفقیت و دستاوردهای بزرگ آرزو کرد.
