نگرانی رحمان از تجمع گروه های تروریستی در مرز تاجیکستان و افغانستان

رییس جمهوری تاجیکستان در پایان سفر به ولایت بدخشان از وضع متشنج مرز این کشور با افغانستان ابراز نگرانی کرد.

به گزارش رادیو تاجیکی صدای خراسان به نقل از سامانه اسپوتنیک، امامعلی رحمان رییس جمهوری تاجیکستان که برای افتتاح طرح های اقتصادی، اجتماعی و فرهنگی به ولایت بدخشان رفته بود در دیدار با مقامات دولتی، فعالان و نمایندگان مردم این منطقه در شهر خاروغ ، تجمع گروه های تروریستی در ولایت بدخشان افغانستان را برای کشورش نگران کننده ارزیابی کرد.

رییس جمهوری تاجیکستان گفته است که از مرز نزدیک به  هزار و 400 کیلومتری مشترک تاجیکستان با افغانستان 910 کیلومتر در قلمرو ولایت بدخشان واقع  شده است و گروههای سازمان یافته جنایی، قاچاقچیان مواد مخدر و تسلیحات در دو طرف مرز با یکدیگر همکاری می کنند.

امامعلی رحمان افزود: از این رو به منظور تقویت مرز با افغانستان در سال های 2018 تا 2020 تاجیکستان 50 پاسگاه جدید مرزبانی در شهرخاروغ، نواحی درواز و اشکاشیم تاسیس کرد.

به گفته رییس جمهوری تاجیکستان، بر اساس گزارش مقامات امنیتی ولایت بدخشان در سالهای 2019 تا 2020 از 208 نفر که به اتهامات مختلف بازداشت شده اند، 143 تن اعضای گروههای سازمان یافته جنایی هستند که 67 نفر آنان اتباع افغانستان بوده اند.