بررسی همکاری‌های ناتو و تاجیکستان
سفیر تاجیکستان در بلژیک و اتحادیه اروپا و دبیرکل سازمان پیمان آتلانتیک شمال (ناتو)، موضوع همکاری های دوجانبه را مورد بررسی قرار دادند.
به گزارش رادیو تاجیکی به نقل از آسیا پلوس، "ایرکین رحمت‌الله‌زاده" و "ینس استولتنبرگ" Jens Stoltenberg در این دیدار درباره مبارزه با تروریسم بین‌المللی، تحکیم مرزهای مشترک تاجیکستان با افغانستان، مقابله با فعالیت گروه‌های قاچاقچی مواد مخدر، همکاری در چارچوب برنامه مین‌روبی در تاجیکستان و مشارکت دوشنبه در طرح‌های ناتو به بحث و تبادل نظر پرداختند.
استولتنبرگ در این دیدار تاکید کرد که ناتو بر اساس برنامه "مشارکت برای صلح ناتو" که تاجیکستان نیز عضو آن است، به همکاری با این کشور ادامه خواهد داد.
وی از آمادگی ناتو برای ارائه کمک‌های فنی و آموزشی به نیروهای مسلح تاجیکستان خبر داد.
ینس استولتنبرگ و ایرکین رحمت‌الله زاده بر ضرورت هماهنگی دو جانبه برای مقابله با تهدیدات امنیتی ناشی از فعالیت گروه‌های تروریستی در افغانستان و تلاش مشترک برای برقراری امنیت و ثبات در این کشور تأکید کردند.
ایرکین رحمت الله زاده سفیر تاجیکستان در بلژیک و اتحادیه اروپا، در این دیدار استوارنامه خود را به عنوان نماینده این کشور در پیمان ناتو به دبیرکل این سازمان تقدیم کرد.