امضای چند سند همکاری در دیدار رییسان جمهور تاجیکستان و افغانستان
-
محمد اشرف غنی رییس جمهور افغانستان برای حضور در کنفرانس قلب آسیا در دوشنبه تاجیکستان حضور دارد
در پی دیدار و گفت و گوی رییسان جمهوری تاجیکستان و افغانستان در دوشنبه یادداشت تفاهم سیاسی و چند سند همکاری به امضا رسید.
به گزارش رادیو تاجیکی صدای خراسان به نقل از دفتر مطبوعاتی ریاست جمهوری تاجیکستان، در دیدار امامعلی رحمان و اشرف غنی در دوشنبه درباره همکارهای اقتصادی و تجاری، امنیتی و انتظامی، حمل و نقل، انرژی و آموزشی و فرهنگی دو کشور بحث و تبادل نظر شد.
رحمان در نشست خبری مشترک با همتای افغانستانی خویش گفت: «در حال حاضر در مناطق مرزی دو کشور 4 منطقه آزاد اقتصادی و 4 بازارچه مرزی فغالیت می کند. برای تامین ارتباط زمینی تاجیکستان و افغانستان 6 پل ساخته شده است و روزهای نزدیک ساخت پل هفتم میان ولایت ختلان و ولایت تخار آغاز می گردد. تاجیکستان همه ساله به افغانستان 1 میلیارد و 500 میلیون کیلووات ساعت برق صادر می کند که در آینده این میزان افزایش خواهد یافت. امروز در دانشگاه های تاجیکستان 500 دانشجوی افغانستانی تحصیل می کنند.»
در پایان مذاکرات رییسان جمهوری تاجیکستان و افغانستان سازشنامه های همکاری در بخش های اقتصادی و تجاری، امنیتی و انتظامی، حمل و نقل، انرژی و آموزشی و فرهنگی میان دو کشور به امضا رسید.
همچنین برنامه همکاری وزارت های کارهای داخله دو کشور در مبارزه با تروریسم، جنایت‌های سازمان یافته و قاچاق مواد مخدر برای سال های 2021 تا 2022 امضا شد.
یکی از سازشنامه ها نیز مربوط به همکاری کمیته دولتی زبان و اصطلاحات تاجیکستان با فرهنگستان علوم افغانستان است.
لازم به ذکر است که نهمین نشست وزیران امور خارجه کشورهای عضو ابتکار "قلب آسیا" درباره افغانستان روز 30 مارس در شهر دوشنبه با سخنرانی امامعلی رحمان رییس جمهور تاجیکستان و محمد اشرف غنی همتای افغانستانی وی آغاز می گردد.
بیشتر بخوانید:
