واکنش وزارت امور خارجه افغانستان به اظهارات کوچی
وزارت امور خارجه افغانستان با انتشار بیانیهای اعلام کرد اظهارات اخیر سفیر این کشور در مسکو در ارتباط با تاجیکستان بیانگر موضع حکومت وحدت ملی نیست.
به گزارش رادیو تاجیکی صدای خراسان، وزارت امور خارجه افغانستان در بیانیهای از کشور تاجیکستان به عنوان همسایه خوب و دوست همیشگی یاد کرد و اظهارات قیوم کوچی سفیر افغانستان در روسیه را درباره دولت دوشنبه و مسکو، نظر شخصی او اعلام کرد.
عبدالقیوم کوچی سفیر افغانستان در مسکو گفته بود که مواد مخدر در افغانستان تولید میشود ولی از قاچاق این مواد گروههای مافیایی تاجیکستان و روسیه حمایت میکنند.
حکومت تاجیکستان سفیر افغانستان در دوشنبه را در واکنش به اظهارات اخیر عبدالقیوم قیوم کوچی احضار کرد و با ارسال نامهای خواستار بررسی این موضوع از سوی دولت افغانستان شد.
ضمیر کابلوف نماینده ویژه رییس جمهور روسیه در امور افغانستان نیز ضمن ابراز مراتب نگرانی خود به سفیر افغانستان در مسکو، گفت که تاجیکستان متحد روسیه است و هرگونه اهانت به این کشور با واکنش شدید مسکو روبه رو خواهد شد.
وزارت امور خارجه افغانستان جولای 2016 بر اساس فرمان مستقیم ریاست جمهوری این کشور، عبدالقیوم کوچی را به عنوان سفیر افغانستان در مسکو معرفی کرده بود.
پیش از آن عزیزالله کرزی عموی حامد کرزی رییس جمهور سابق افغانستان سفیر کابل در مسکو بود.