طالبان به مرز تاجیکستان نزدیک شدند

مقامات ولایت تخار در شمال افغانستان از اشغال بخش‌هایی از ناحیه دشت قلعه در نزدیکی مرز تاجیکستان توسط گروه طالبان خبر داده‌اند.

به گزارش رادیو تاجیکی صدای خراسان به نقل از تاپ ‌تی ‌جی، خلیل اسیر سخنگوی والی ولایت تخار گفته است که جنگجویان طالبان روز 30 می به مرکز ناحیه دشت قلعه حمله کرده و بخشهایی از این منطقه را که در نزدیکی مرز تاجیکستان است، در کنترل گرفته اند.

این در حالی است که قبلا گروه طالبان دو ناحیه درقد و خواجه بهاء الدین در ولایت تخار در نزدیکی مرز مشترک افغانستان با تاجیکستان را در اختیار گرفته بودند.

از سوی دیگر سخنگوی نیروی مرزبانی تاجیکستان گفته است که از تحرکات گروه طالبان در نزدیکی مرز مشترک این کشور با افغانستان اطلاع دارند و اوضاع تحت کنترل است.

محمد اولوغ خواجه‌اف تاکید کرده است که تحولات اخیر در آن طرف ساحل رودخانه مرزی پنج را به دقت رصد می کنند و هیچ تلاشی برای عبورغیرمجاز از افغانستان به داخل قلمرو تاجیکستان مشاهده نشده است.

ناحیه دشت قلعه ولایت تخار افغانستان روبه روی دو ناحیه میرسیدعلی همدانی و فرخار تاجیکستان واقع شده و ساکنان این مناطق می گویند که به شنیدن صدای تیر از آن طرف ساحل رودخانه مرزی پنج عادت کرده اند.