Лориҷонӣ: Ҳимоят аз ваҳдати уммати исломӣ аз авлавиятҳои аслии Эрон аст

Порс тудей- Дабири шурои олии амнияти миллии Ҷумҳурии Исломии Эрон дар нишасти бо уламо ва раҳбарони мазҳабии Покистон бо шарҳи меҳварҳои тавофуқ бо мақомоти ин кишвар аз барномарези барои афзоиши ҳаҷми мубодилоти тиҷорӣ то 10 миллиард доллар ва густариши хутути транзити ва рейли хабар дод.

Дар мулоқоти муштараки Али Лориҷонӣ, дабири шурои олии амнияти миллии Ҷумҳурии Исломии Эрон ва гурӯҳе аз олимон ва чеҳраҳои маъруфи шиъа ва суннии Покистон, ки дар сафорати Ҷумҳурии Исломии Эрон дар Исломобод баргузор шуд, роҳҳои тақвияти ваҳдати исломӣ, дастгирии муқовимати Фаластин ва густариши ҳамкориҳои иқтисодӣ ва амниятӣ байни ду кишвар баррасӣ шуданд.

Созишномаҳои иқтисодӣ ва тиҷоратӣ байни Эрон ва Покистон

Лориҷонӣ бо ишора ба мулоқотҳояш бо мақомоти баландпояи Покистон, созишномаҳои муҳими иқтисодиро байни ду кишвар эълон карду гуфт: Барои афзоиши ҳаҷми мубодилаи тиҷорат то 10 миллиард доллар созишномаҳо ба даст омадаанд ва заминаҳои зарурӣ барои истифодаи имкониятҳои васеи бахшҳои гуногун барои мардум фароҳам оварда мешаванд. У афзуд баъзе аз ниёзҳои Покистон тавассути Эрон қонеъ карда мешаванд ва роҳҳои ҳалли мушкилоти ба вуҷуд омада аз таҳримҳо ва пайвастани бозорҳои мукаммали ду кишвар ба якдигар низ дар ин мулоқотҳо баррасӣ шуданд.

Рушди зерсохтори транзитӣ байни Эрон ва Покистон

Дабири уӯрои олии амнияти миллии Эрон инчунин аз густариши хатсайрҳои транзитӣ ва роҳи оҳан байни ду кишвар хабар дод ва гуфт, ки ин тадбирҳо ҳаракати мусофирон ва интиқоли молҳои заруриро осон хоҳанд кард. У ин созишномаҳоро барои осон кардани мубодилаи тиҷоратӣ ва иқтисодӣ байни Теҳрон ва Исломобод баррасӣ кард.

Қадрдонӣ аз пуштибонии Покистон

Дар ин мулоқот, Лориҷонӣ аз мавқеъ ва пуштибонии мардуми Покистон ва олимон дар ҷанги ахир алайҳи Эрон қадрдонӣ кард ва ин пуштибониро нишонаи амиқи пайванди байни ду миллат донист. Ӯ бо ишора ба масъалаҳои минтақавӣ ва мушкилоти уммати исломӣ таъкид кард: Ҳамкории амниятӣ байни Эрон ва Покистон аҳамияти бузург дорад ва пуштибонӣ аз мардуми Фаластин ва ҳалли ихтилофот байни кишварҳои мусалмонӣ меҳварҳои асосии музокироти ӯ бо бисёре аз раҳбарони кишварҳои исломӣ, аз ҷумла Покистон, будааст.

Ҳушдор дар бораи сиёсати тафриқаандози Ғарб

Дабири шурои олии амнияти миллии Эрон бо ишора ба талошҳои Ғарб барои эҷоди тафриқа байни мусалмонон, қайд кард: Ғарб ҳамеша кӯшиш мекунад, ки тафриқа байни мусалмонон ва эҷоди ихтилофот байни кишварҳо барои густариши қудрати худ эҷод кунад ва аз ин рӯ, раҳбарони кишварҳои исломӣ, бахусус раҳбарони динӣ, ки нуфузи баланди иҷтимоӣ доранд, бояд дар тақвияти ваҳдати уммати исломӣ нақши фаъол бозанд. У таъкид кард: Муқовимат бо сиёсати тафриқаандози Ғарб ва дастгирии ваҳдати уммати исломӣ аз ҷумлаи авлавиятҳои асосии Ҷумҳурии Исломии Эрон аст.

Таъкиди раҳбарои мазҳабии Покистон бар ваҳдати уммати исломӣ

Олимони покистонӣ ва пешвоёни динии Покистон низ дар ин мулоқот ба ягонагии миллати исломӣ, пуштибонӣ аз Эрон ва Фаластин ва тақвияти ҳамкориҳои иқтисодӣ, дифоӣ ва минтақавӣ таъкид карданд. Онҳо бо ишора ба аҳамияти барномаи ҳастаии сулҳҷӯёнаи Эрон гуфтанд: Ин барнома барои эҷоди боздорандагӣ ва қудрати миллати исломӣ муҳим аст ва Эрон ҳеҷ гоҳ дар пайи ҷанг набудааст ва ба ҳеҷ кишваре ҳамла накардааст.

Таъкид ба ҳамкории стратегӣ байни Эрон ва Покистон

Дар ин мулоқот зарурати тақвияти амният, дифоъ ва пешрафти иқтисодии кишварҳои исломӣ таъкид шуд, то душманон аз заъфҳо истифода набаранд. Пешвоёни динии Покистон қайд карданд: Зарур аст, ки ҳамкориҳои дифоӣ ва стратегӣ рушд дода шаванд, як иттиҳоди минтақавӣ таъсис дода шавад ва ҳамкориҳои илмӣ ва иқтисодӣ байни ду кишвар, миллатҳои исломӣ ва қудратҳои минтақавӣ тақвият дода шаванд.