Покистон воридоти газ аз Эронро афзоиш медиҳад

Порс Тудей — Вазири нафти Покистон аз тасмими кишвараш барои афзоиши воридоти гази моеъ (LPG) аз Эрон хабар дод.

Ба гузориши Порс Тудей ба нақл аз хабаргузории Садо ва Симо; Алӣ Парвиз Малик, вазири нафти Покистон дар нишасти хабарӣ дар шаҳри Лоҳур гуфт: «Равобити мо бо Эрон як робитаи бародарона ва ҳамсоягии наздик аст ва муътақидам, ки мо бояд аз тавонмандиҳои мутақобил баҳрабардорӣ намоем».

Вазири нафти Покистон таъкид кард: «Рӯзона байни 4 то 5 ҳазор тон гази моеъ (LPG) аз Эрон ворид мекунем ва акнун тасмим дорем ин мизонро афзоиш диҳем».

Ӯ афзуд: «Тимҳои фаннии Эрон ва Покистон бо якдигар дар тамоси наздик ҳастанд ва талош дорем ниёзҳои энергияро, ки барои Покистон мақрун ба сарфа бошад, аз тариқи Эрон таъмин кунем ва давлати Исломобод тасмими лозимро иттихоз хоҳад кард».