Леонел Мессии эронӣ; сюжети расонаҳо

Шабоҳати ҷавони эронии аҳли Теҳрон ба Леонел Месси, ситораи тими миллии футболи Аргентина ва тими Барселонаи Испания сюжети расонаҳои хабарӣ ва варзишии Эрон шудааст.

Ба гузориши радиои тоҷикии Садои Хуросон, ба нақл аз хабаргузории “Меҳр”, Ризо Парастиш, ҷавони теҳронӣ, ки шабоҳати аҷибе ба Леонел Месси дорад, мутаваллиди соли 1371-и хуршедӣ (1992) аст ва дар риштаи шаҳрсозӣ таҳсил мекунад.

Ӯ мегӯяд, падараш аз шаш соли қабл исрор мекардааст, ки аксҳояшро барои сайтҳо ва маҷаллаҳои варзишӣ бифиристад, аммо худаш мавзӯро ҷиддӣ намегирифтааст то ин ки саранҷом панҷ моҳ қабл ба исрори падар, бо пероҳани тимҳои Аргентина ва Барселона акс мегирад ва барои расонаҳои варзишии эронӣ мефиристад.

Ба гуфтаи Ризо Парастиш, вокунишҳо ба интишори аксҳояш бисёр зиёд ва аҷиб будааст ва ҳатто бархе тарафдорони Месси аз ин мавзӯъ нороҳат шудаанд, зеро онон дӯст надоштанд ҳеҷ касе шабеҳи ситораи маҳбубашон бошад.

Мессии эронӣ таъкид мекунад, барои шабеҳ шудан ба ситораи Барселона ҳеҷ кори хосе, аз ҷумла ҷарроҳӣ анҷом надода ва ҳатто ҳамқад ва ҳамвазни Леонел Месси аст.

Вай мегӯяд, танҳо ин рӯзҳо ришашро монанди Месси ислоҳ мекунад ва дӯст дорад Месси риши худро бизанад то ӯ битавонад ба ҳама собит кунад, ки воқеан шабеҳи Месси аст.