Поёни сафари раисҷумҳури Қазоқистон ба Тоҷикистон
Эмомалӣ Раҳмон, раисиҷумҳури Тоҷикистон муҳтарам бо нишони эҳтироми хос раисиҷумҳури Қазоқистон Қосим-Жомарт Тоқаевро самимона гусел карданд.
Ба навиштаи сомонаи Ховар, раисиҷумҳури Қазоқистон бо изҳори сипос аз меҳмоннавозии Эмомалӣ Раҳмон, раисиҷумҳури Тоҷикистон ва таассуроти нек аз ин сафари бобарор аз шаҳри Душанбе ба ватан баргаштанд.
Ёдовар бояд шуд, ки рӯзҳои 22-23 август Президенти Ҷумҳурии Қазоқистон муҳтарам Қосим-Жомарт Токаев бо сафари давлатӣ дар Ҷумҳурии Тоҷикистон қарор доштанд.
Дар доираи сафар меҳмони олиқадр бо Президенти Ҷумҳурии Тоҷикистон муҳтарам Эмомалӣ Раҳмон ва дигар шахсони воломақоми Тоҷикистон мулоқоту вохӯриҳои судманд анҷом доданд.
Аз рӯйи натиҷаи сафари давлатӣ 16 санади нави ҳамкорӣ, аз ҷумла санади муҳиму таърихӣ – “Аҳднома дар бораи муносибатҳои ҳампаймонӣ миёни Ҷумҳурии Тоҷикистон ва Ҷумҳурии Қазоқистон” ба имзо расид, ки омили муҳиму таконбахши таҳкиму тавсеаи муносибатҳои дӯстӣ ва шарикии стратегии ду кишвар гардид.
Баргузории рӯзҳои фарҳанги Қазоқистон дар Тоҷикистон ва анҷумани пурмаҳсули сармоягузорону соҳибкорони ду кишвар низ аз бахшҳои пурарзиши сафари давлатии муҳтарам Қосим-Жомарт Токаев ба Тоҷикистон буд.