Кашфи садҳо кг маводи мухаддир дар амалиёти СПАД

Зимни амалиёте дар кишварҳои Созмони Паймони Амнияти Дастаҷамъӣ (СПАД) садҳо кило маводи мухаддир ва лавозимоти ҷангӣ ифшо шуд.

Котиботи СПАД мегӯяд, ки дар ҷараёни амалиёт ҳамзамон 34 аслиҳаи оташфишон ва ҳудуди 1457 адад лавозимоти ҷангӣ низ мусодира шуд.

Зимни як амалиёти махсус дар қаламрави кишварҳои СПАД 590 кило маводи мухаддир мусодира шудааст.

Дар ин бора дафтари матбуоти СПАД гузориш дода гуфтааст, ки амалиёт таҳти унвони "Канал-Авангард" тайи чаҳор рӯзи ҳафтаи гузашта идома ёфт.

Гуфта мешавад, ки Ситоди байналмиллалии ҳамоҳангсозӣ барои мудирияти амалиёт дар шаҳри Душанбе мустақар шудааст.

Дар ин амалиёт ҳудуди 24 ҳазор корманди мақомоти салоҳиятдор, дастаҳои кинологӣ, ҳавопаймоҳои бесарнишин, таҷҳизоти махсус ва санҷишӣ ҷалб карда шуданд.