Нуқтаи Эмомалӣ Раҳмон бар поёни баҳси симкортҳо
Эмомалӣ Раҳмон, раисиҷумҳури Тоҷикистон бо имзои қарори ҳукумат тартиб ва талаботи пайвастшавӣ ба шабакаи алоқаи барқӣ дар кишварро тағйир дод.
Ба нақл аз Спутник, бар асоси тағйирот ба қарори ҳукумат, “Дар бораи тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он”, ки аз ҷониби раисиҷумҳур 9 феврал имзо гардидааст, симкорти шахсоне, ки шиносномаи намунаи соли 2014 надоранд, аз нав ба қайд гирифта мешаванд.
“Хадамоти алоқаи Тоҷикистон барои ба номи як шахс ба расмият даровардани на зиёда аз ду симкорт дар ҳамаи операторони хизмати алоқаи барқӣ ва азнавбақайдгирии симкортҳои шахсоне, ки шиносномаи шаҳрванди Тоҷикистон намунаи соли 2014-ро надоранд, дар давоми 6 моҳ чораҷӯӣ намояд”, - омадааст дар қарори Ҳукумат.
Ҳукумат масъулини соҳаро барои насби камераҳои мушоҳидавӣ дар нуқтаҳои хариду фурӯши симкортҳо уҳдадор намуда, муваззаф кардааст, ки зиёда аз ду симкортро ба номи як шахс (дар ҳамаи операторони хизмати алоқаи барқӣ) ба расмият надароранд.
“Хизматрасонии симкортҳое, ки дар муҳлати 6 моҳ истифода бурда намешаванд, қатъ кунанд. Ҳангоми пайвастшавӣ ба шабакаи алоқаи барқӣ нусхаи ҳуҷҷатҳои пешниҳодшавандаро, аз ҷумла дар шакли электронӣ дар муҳлати муқаррарнамудаи қонунгузории Тоҷикистон дар соҳаи бойгонӣ нигоҳ доранд”, - вазифадор шудаанд ширкатҳои масъули соҳа.
Ҳукумат инчунин муқаррар кардааст, ки ноболиғон аз синни 16 бо ризояти хаттии падару модар ё намояндагони дигари қонунӣ метавонанд бо пешниҳоди шиносномаи шаҳрванди Тоҷикистон намунаи соли 2014 симкортро ба номи худ дастрас намоянд.
“Падару модар ва намояндагони дигари қонунӣ уҳдадоранд истифодаи симкортро аз ҷониби фарзандони ноболиғ ва ё шахсони таҳти васоят ва парастории онҳо қарордошта назорат баранд”, - таъкид шудааст дар қарор.
Дар мавриди фурӯши симкортҳо ба шаҳрвандони хориҷӣ, шахсони бешаҳрванд ва гурезаҳо ҳукумат муқаррар кардааст, ки бо пешниҳоди гувоҳномаи иқомат барои шаҳрванди хориҷӣ дар Тоҷикистон, гувоҳномаи иқомат барои шахси бешаҳрванд дар Тоҷикистон ё шаҳодатномаи гуреза ба расмият дароварда мешавад.