Сентябр 23, 2019 21:18 Asia/Dushanbe
  • Мулоқоти Эмомалӣ Раҳмон бо Дабири кулли Созмони умумиҷаҳонии гумрук

Эмомалӣ Раҳмон бо Дабири кулли Созмони умумиҷаҳонии гумрук дар Душанбе дидор кард.

Имрӯз (23 сентябр) Эмомалӣ Раҳмон, раисиҷумҳурии Тоҷикистон бо Дабири кулли Созмони умумиҷаҳонии гумрук Кунио Микурияро дар Қасри миллат мулоқот намуд.

Ба навиштаи сомонаи Ховар, дар ҷараёни мулоқот ҳолати кунунӣ ва дурнамои шарикии Тоҷикистон бо Созмони умумиҷаҳонии гумрук мавриди баррасӣ қарор дода шуд.

Эмомалӣ Раҳмон бо итминон иброз дошт, ки натиҷаи ин мулоқот қадами устуворе дар роҳи таҳкиму тавсеаи робитаҳои самарабахши дуҷониба хоҳад шуд.

Таъкид гардид, ки Ҳукумати Ҷумҳурии Тоҷикистон аз рӯзҳои аввали соҳибистиқлолӣ ислоҳотро дар ҳама бахшҳои тиҷорату иқтисод амалӣ гардонида истодааст ва дар ин раванд ба такмили бомароми фаъолияти гумрукӣ низ таваҷҷуҳи пайваста зоҳир мегардад.

Ҷонибҳо масъалаҳои мукаммалгардонии маъмурияти гумрук, низоми иттилоотии автоматикунонидашудаи он бо технологияҳои муосир, таҷдиди инфрасохтори гумрук, тайёр кардани кадрҳои соҳа ва баланд бардоштани савияи ихтисоси онҳоро муҳокима карданд.

Дар ин мулоқот ҳамчунин такмили қонунгузорӣ дар арсаи тиҷорату иқтисод ва амалисозии сиёсати давлатии дастгирии содирот баррасӣ гардид.