Чаро Тоҷикистон шарики ҷолибе барои Иттиҳоди иқтисодии АвруОсиё нест?

Коршиноси масоили сиёсии Қазоқистон муътақид аст, ки Тоҷикистон шарики ҷолибе барои кишварҳои узви Иттиҳоди иқтисодии АвруОсиё нест ва беҳтар аст дар оғоз ба узвияти нозири ин ниҳоди ҳамгароии минтақаӣ дарояд.

Ба гузориши сомонаи русии “REGNUM” Марат Шибутов гуфтааст, ки ба иллати мусоид набудани фазои сармоягузорӣ дар Тоҷикистон, бахши хусусии Қазоқистон наметавонад дар ин кишвар манобеи молии калон ҳазина кунад.

Вай афзуд: “Мизони сармоягузории кишварҳои узви Иттиҳоди иқтисодии АвруОсиё дар иқтисоди Тоҷикистон ночиз мебошад ва танҳо ба равобити тиҷорӣ маҳдуд шудааст”.

Мақомоти Тоҷикистон дар шаш соли ахир ҳамвора эълом кардаанд, ки мавзӯи пайвастани ин кишвар ба Иттиҳоди иқтисодии АвруОсиёро дар дасти баррасӣ доранд.

Узвият дар ин иттиҳодия ба коргарони муҳоҷири тоҷик имтиёзоту сабукиҳое эъто хоҳад кард ва рафту омади озодонаи нерӯи кор, сармоя ва маҳсулотро фароҳам месозад.

Набуди далел барои мухолифат бо узвияти Тоҷикистон дар Иттиҳоди иқтисодии АвруОсиё  

Аз сӯи дигар, Маркази пажӯҳишҳои Бонки АвруОсиё дар гузорише эълом кардааст, ки иллати тааллули Тоҷикистон дар пайвастан ба Иттиҳоди иқтисодии АвруОсиё омода набудани асноди ҳуқуқӣ ва мушкилоти иқтисодии ин кишвар мебошад.