Тоҷикистон назоратҳои беҳдоштӣ бар вуруди мусофиронро ташдид кард
-
Мусофирони хатсайрҳо аз Истанбулу Кобул бояд аз СOVID-19 тести иловагӣ супоранд
Вазорати тандурустӣ мегӯяд, мусофирони хатсайрҳо аз Истанбулу Кобул бояд аз санҷиши махсус гузашта, инчунин аз СOVID-19 тести иловагӣ супоранд.
Ба иттилои Азия-Плюс, Наврӯз Ҷаъфаров, сардори Раёсати Хадамоти санитарӣ-эпидемиологии Вазорати тандурустии Тоҷикистон гуфт, айни замон шаҳрвандон ҳамаи кишварҳо тариқи роҳи ҳавоӣ ба Тоҷикистон омада метавонанд, лекин мусофирон аз баъзе кишварҳо аз назорати махсус мегузранд.
“Шаҳрвандони ҳамаи давлатҳо бо истифода аз хатсайрҳои мавҷуда ва парвозҳои чартерии бо ситод мувофиқашуда ба Тоҷикистон ворид шуда метавонанд. Дар сурате, ки омадани шаҳрвандони хориҷӣ лозим бошад, масалан сафарҳои корӣ ё вуруди кормандони машғули кор дар Тоҷикистон, намояндагиҳои дипломатии ин кишвар ё ширкатҳо ба Ситоди ҷумҳуриявӣ барои гирифтани иҷозатнома муроҷиат мекунанд”, - хабар дод Ҷаъфаров.
Ӯ гуфт, барои ворид шудан ба Тоҷикистон маълумотнома (справка) дар бораи сироят надоштан аз коронавирус, ки 72 соат то расидан дода шудааст, талаб мешавад, лекин мусофирони баъзе кишварҳо тести иловагӣ месупоранд.
“Мусофиронеро, ки аз Русия, АМА, Қазоқистон, Узбакистон ва Қирғизистон меоянд, бо тести манфӣ аз коронавирус ба кишвар роҳ медиҳанд. Лекин мусофирон аз Истанбулу Кобул дар фурудгоҳи Душанбе аз санҷиши махсус гузашта, тести иловагӣ месупоранд. Ҳамчунин ба онҳо тавсия дода мешавад, ки муддати 3 рӯз дар карантини хонагӣ нишаста, натиҷаҳои тестро мунтазир шаванд”, - гуфт сардори Раёсат.
Ба гуфтаи ӯ, ин тасмим барои он гирифта шудааст, ки дар Туркия вазъи эпидемиологӣ шиддат гирифта, Афғонистон ноамн аст.
