Коршиноси исроилӣ: Тавони иттилоотии Эрон таҳдиде фаротар аз мӯшакҳост

Порс Тудей- Коршиноси шабакаи саҳюнистӣ гуфт: Нуфузу ишрофи иттилоотии Эрон дар умқи режими саҳюнистӣ ба маротиб бештар аз мӯшакҳои Эрон аст.

Як коршиноси амниятии шабакаи 12 Исроил эълом кард, нуфузу ишрофи иттилоотии Эрон дар умқи сохторҳои амниятӣ ва иҷтимоии Исроил «ба маротиб қавитар» аз қудрати мушакии Эрон аст.

Ба гузориши Порс Тудей, ба гуфтаи ин коршиноси исроилӣ, сатҳи иттилоотие, ки Эрон дар бораи Исроил дар ихтиёр дорад «нигаронкунанда ва озордиҳанда» аст ва агар саҳюнистҳо аз мизони ин иттилоот огоҳ шаванд, ба шиддат шигифтзада хоҳанд шуд.

Ин коршиноси амниятӣ эълом кард, ки Эрон ба иттилооте аз ҷумла номҳо, тасовир, иртибототи хонаводагӣ ва маҳали кории бархе афрод дар Исроил дастрасӣ дорад; иттилооте, ки ба гуфтаи ӯ, дар дохили Исроил иҷозаи интишори умумӣ надоранд. Вай ин сатҳ аз дастрасиро «бисёр нигаронкунанда» тавсиф кард.

Ӯ бо ишора ба нақши ҷанги равонӣ дар мунозиъоти амниятӣ гуфт, ки ҳадаф аз ин навъи амалиёт, тазъифи рӯҳияи ҷомеъаи Исроилу эҷоди тамоюл ба муҳоҷират дар миёни шаҳрвандон аст. Ба гуфтаи ӯ, ин «зарбаи шинохтӣ», яке аз аҳдофи аслии Эрон аст ва аз назари таъсиргузорӣ, метавонад фаротар аз қудрати мушакӣ бошад.

Ин коршиноси амниятии Исроил эълом кард, ки Эрон дар Телеграм сафҳае ба забони ибрӣ идора мекунад, ки дар он ахбори зидди исроилӣ мунташир мешавад ва ин фаъолиятҳо тавассути ниҳодҳои амниятӣ ва иттилоотии Эрон, ки дар ҳавзаи сойберӣ ҳамкорӣ мекунанд, ҳидоят мешавад. Ӯ ин маҷмӯъаро «артиши сойберӣ» тавсиф кард ва гуфт, онҳо тавонмандиҳои зиёде доранд, тавонмандиҳое, ки аз кишварҳои қудратманди дигар ҳам дарёфт кардаанд ва аз ин тавонмандиҳо дар ин корзори сойберӣ истифода мекунанд. Онҳо дар ин буъд муваффақиятҳое ҳам доранд; муваффақиятҳое, ки аз кишваре бо ин сатҳи қудрат ва бо ин абзорҳо интизор меравад. Яке аз намунаҳое, ки метавонам зикр кунам, гуруҳи ҳакерие ба номи «Ҳанзала» аст.

Вай гурӯҳи ҳакерии «Ҳанзала»-ро яке аз намунаҳои фаъол дар ин ҳавза муаррифӣ кард ва гуфт, ин гуруҳ солҳост амалиёти сойберии таҳоҷумӣ алайҳи Исроил анҷом медиҳад. Ба гуфтаи ӯ, ҳамалоти сойбирӣ «абзори ҷанги хомӯш» ҳастанд, ки таъсири қобили таваҷҷӯҳе бар зеҳнияти умумӣ дар Исроил мегузоранд.

Ин коршиноси амниятӣ бо ишора ба чанд рухдоди ахир эълом кард, ки дар моҳи сентябр телефони Исраэл Катс, вазири ҷанги Исроил ҳадафи ҳамла қарор гирифт ва дар моҳи декабр ҳисоби телеграммии Naftali Bennett, нахуствазири собиқи Исроил ҳак шудааст. Ҳамчунин телефони ҳамроҳи раиси дафтари нахуствазиру вазири додгустарии пешин низ мавриди нуфуз қарор гирифтааст. Ӯ ин тавоноиро «таркибе аз фанноварӣ ва иттилооти инсонӣ» донист.

Ба гуфтаи вай, нуфуз ба сомонаҳои диҷитал метавонад имкони дастрасӣ ба адрес, шумораи телефон, радёбӣ, шунуди муколимоту назорат бар рафту омади афродро фароҳам кунад. Ӯ афзуд, истифода аз абзорҳои мавқеъиятёб дар телефонҳои ҳамроҳ низ метавонад дар ҷамъоварии иттилооти амалиётӣ нақш дошта бошад ва ин сатҳ аз тавонмандиро «нигаронкунанда» тавсиф кард.