Оё Ҳинду Чин таслими таҳримҳои нафтии Амрико хоҳанд шуд?

Порс-Тудей. Таҳримҳои ҷадиди Доналд Трамп, раиси ҷумҳури Амрико алайҳи ду ғӯли нафтии Русия муҷиби навасони шадид дар бозорҳои ҷаҳонӣ шуд. Вале оё кишварҳои дигар ба ин таҳримҳо пойбанд хоҳанд буд ё аз онҳо табаият нахоҳанд кард?

Ҳафтаи гузашта Вашингтон бо таҳрими 2 ширкати нафтии аслии Русия, яъне “Руснафт” ва “ЛукОйл” дар садад баромад то фишорҳо бар Русияро афзоиш диҳад. Маъмурияти Трамп барои фишор бар Русия акнун ба як масъалаи сода, аммо таъйинкунанда расида аст: оё раисиҷумҳури Амрико метавонад ҷаҳонро мутақоид кунад, ки аз хариди сӯхти фусилии Русия даст бикашад?

Ба гузориши “Порс-Тудей”, ба нақл аз ИРНА, ба гуфтаи Том Кетинг, мудири Маркази амнияти молӣ дар Андешакадаи низомии RUSI, таҳримҳои Амрико дар 24 соат беш аз таҳримҳои Иттиҳоди Аврупо дар шаш моҳи гузашта муассир будааст. Трамп ҳозир аст ҳарфҳоеро бизанад, ки дигарон аз гуфтанаш худдорӣ мекунанд. Ин таҳримҳо метавонад бисёр сарнавиштсоз бошад.

Ин таҳримҳо ширкатҳоеро, ки нафти Русияро мехаранд, аз дастрасӣ ба низоми молии мубтанӣ бар доллар маҳрум мекунад; иқдоме ки бештарин асарро бар Чин ва Ҳинд хоҳад гузошт. Ду кишваре ки аз замони оғози ҷанги Украина ба бузургтарин харидорони энержии Русия табдил шудаанд.

Дар сооти нахусти иҷрои таҳрим, қимати ҷаҳонии нафт ҳудуди шаш дарсад афзоиш ёфт ва хабарҳо аз таваққуфи ногаҳонии таҳвили нафти Русия ба полоишгоҳҳои бузурги Ҳинд ва ширкатҳои давлатии Чин ҳикоят дошт .

Лук Викенден, таҳлилгари Маркази пажӯҳиши энержӣ ва ҳавои пок (CREA) ин коҳиши эҳтимолии воридоти осиёиро барои даромадҳои содиротии Кремл вайронгар донист. Вай тавзеҳ дод, ки агар Русия дастрасӣ ба бозорҳои Чину Ҳиндро аз даст бидиҳад, моҳона ҳудуди 7. 4 миллиард доллар даромади содиротӣ ва 3. 6 миллиард доллар молиётро аз даст хоҳад дод.

Дар посух ба фишорҳои Вашингтон, Пекин давлати Трампро ба зӯргӯии якҷониба ва фишори иқтисодӣ муттаҳам кард ва ҳушдор дод, ки дар сурати осеб ба манофеи миллии худ, иқдоми қотеи мутақобил анҷом хоҳад дод.

Дар Ҳинд, Трамп муддаӣ шуд, ки Норандро Моди ба ӯ итминон додааст, ки Ҳинд нафти чандоне аз Русия нахоҳад харид ва хоҳони поёни ҷанг аст, аммо давлати Ҳинд ин мавзуъро таъйид накард.

Барои Трамп ин таҳримҳо на танҳо фурсате барои фишор бар Маскав, балки абзоре барои густариши нуфузи иқтисодии Амрико дар бозори энержии Аврупо аст.

Иёлоти Муттаҳида пас аз қатъи хутути лулаи Русия, акнун ба бузургтарин содиркунандаи гази мойеъ (LNG) ба Аврупо табдил шудааст ва 55 дарсад аз воридоти гази мойеи Аврупо дар соли гузаштаро таъмин кардааст, рақаме ки дар соли 2019 тақрибан сифр буд.

Бо вуҷуди тасмими Иттиҳоди Аврупо барои таваққуфи комили воридоти гази Русия то ибтидои соли 2027, коршиносон мегӯянд, ҳанӯз бахши зиёде аз даромади Русия аз тариқи харидҳои гази мойеи ин кишвар тавассути кишварҳои аврупоӣ таъмин мешавад.

Трамп бо эъмоли ин таҳримҳо, дар воқеъ ду ҳадафро ҳамзамон дунбол мекунад: тазъифи молии Русия ва тақвияти содироти энержии Амрико.