Ризояти 40 дарсадии русҳо аз амалкарди Иттиҳоди иқтисодии Авруосиё
Назарсанҷии Маркази таҳқиқоти афкори умумии Русия дар робита бо Иттиҳоди иқтисодии Авруосиё нишон медиҳад, ки 40 дарсади русҳо натоиҷи таъсиси ин иттиҳодияро барои худ ва хонаводаҳояшон мусбат талаққӣ мекунанд.
Ба гузориши хабаргузории Тасним, натоиҷи ҳосил аз мутолиаи Маркази таҳқиқоти афкори умумии Русия дар мавриди назари русҳо дар бораи Иттиҳоди иқтисодии Авруосиё ҳамчунин ҳокӣ аст аз ин 40 дарсад, 22 дарсад тавсеаи иқтисоди Русия ва 19 дарсад беҳбуди стандартҳои зиндагии худро аз натоиҷи фаъолияти Иттиҳоди иқтисодии Авруосиё медонанд.
Ҳамчунин 18 дарсад аз ширкаткунандагон дар ин назарсанҷӣ имкони хариди колоҳои арзонтар ва бо кайфияттар, 16 дарсад вуруди бидуни визаи шаҳрвандони Русия ба тамоми кишварҳои узви иттиҳодия ва 16 дарсади дигар низ афзоиши фурсатҳои шуғлиро аз дастовардҳои таъсиси ин иттиҳодия унвон мекунанд.
Дар маҷмӯъ 39 дарсад аз русҳо моил ба дидани Иттиҳоди иқтисодии Авруосиё ба унвони як иттиҳодияи комилан ҷадид бо шакл ва усули кори худ ҳастанд ва 28 дарсад низ тарҷеҳ медиҳанд, ки ин иттиҳодия ба навъе эҳёи Иттиҳоди ҷамоҳири Шӯравӣ ба сурати ҷадид бо истиқлоли сиёсии кишварҳои ширкаткунанда бошад.
Тавофуқномаи эҷоди Иттиҳоди иқтисодии Авруосиё дар моҳи майи 2014 дар Остона имзо шуд. Дар панҷ соли гузашта, огоҳии русҳо дар мавриди ин иттиҳодия аз 66 ба 76 дарсад афзоиш ёфтааст.
