Тазоҳурот алайҳи Доналд Трамп дар Лондон

Садҳо нафар аз фаъолони зидди нажодпарастӣ дар эътироз ба Доналд Трамп дар назди сафорати Амрико дар Лондон тазоҳурот карданд.

Ба гузориши рӯзномаи “Индепендент”, фаъолони зидди нажодпарастӣ рӯзи чаҳоршанбе алайҳи Доналд Трамп, раисҷумҳури тозаинхоби Амрико дар назди сафорати ин кишвар дар Лондон гирдиҳамоии эътирозие баргузор карданд. Тазоҳуркунандагон дар даст навиштаҳое доштанд, ки дар он Доналд Трамп бо Адолф Гитлер, раҳбари Олмони фашистӣ муқоиса карда шуда буд.

Ҷунбиши “Пойдорӣ дар баробари нижодпарастӣ” масъули баргузор кардани ин таҷаммӯи эътирозӣ будааст.

Нерӯҳои пулис монеаҳои оҳании зиёдеро дар баробари сафорати Амрико дар Лондон қарор дода буданд.

Пас аз эъломи натоиҷи интихоботи раёсатҷумҳури Амрико бархе аз шаҳрҳои Амрико низ шоҳиди гирдиҳамоиҳои хиёбоние алайҳи Доналд Трамп будааст.

Доналд Трамп дар 58-умин интихоботи раёсатҷумҳурии Амрико, ки рӯзи сешанбе баргузор шуд, тавонист бо бештари раъйи интихобкунандагон нисбат ба рақиби демократаш Ҳиллари Клинтон 45-умин раисҷумҳури Амрико шавад.