Daşary ýurt metbugatynda Eýranyň 22-nji Bahman ýörişine giň seslenme
Pars Today – Daşary ýurt habar beriş serişdeleri Eýranda Yslam ynkylabynyň ýeňşiniň 47 ýyllygy mynasybetli geçirilen 22-nji Bahman ýörişine halkyň giň we ruhubelent gatnaşygyny göni ýaýlym arkaly beýan etdiler.
Şu gün Çarşenbe irden 22-nji Bahmanda millionlarça adam Tähranda, şäherlerde, obalarda we dürli welaýatlarda köçelere çykyp, Yslam ynkylabynyň ýeňşiniň 47 ýyllygyny dabaraly ýagdaýda bellediler. Şu ýylky çäreler ýurduň 1400-den gowrak nokadynda geçirildi. Resmi maglumatlara görä, wakalary 7200-e golaý içerki we 200-e golaý daşary ýurtly žurnalist beýan etdi.
Ýörişiň başlanmagy bilen bir wagtda birnäçe halkara habar serişdeleri bu wakany göni ýaýlymda görkezdi. “Reuters” habar gullugy ilkinji minutlardan başlap ýörişiň gidişini göni efirde görkezdi. Şeýle hem Kataryň “Al Jazeera” teleýaýlymy Eýranda geçirilen çäreleri göni ýaýlymda beýan etdi.
Russiýanyň “Ria Novosti” agentligi ýörişden suratlary çap edip, Eýranyň Prezidenti Masud Pezeşkianyň çykyşyndan bölekleri ýetirdi. Habarda onuň: “Biz ýadro ýaragyny gözlemeýäris we islendik barlag üçin taýýardyrys. Eýran basyşlara we adalatsyzlyklara boýun egmez” diýen sözleri getirilýär.
Pakistanyň “Geo News” kanaly halkyň köçelerdäki gatnaşygyny görkezýän wideolary paýlaşyp, Eýranyň halkynyň 47 ýyllygy giň gerimde belleýändigini habar berdi. Liwanly “Al Manar” we “Al Mayadeen” teleýaýlymlary hem ýurduň dürli şäherlerinde geçirilýän ýörişler barada göni ýaýlym alyp bardy.
Palestinanyň “Quds” teleýaýlymy ýöriş mynasybetli görkezilen ballistik raketalar barada maglumat berdi. Şeýle hem Liwanly “Al Ahed” we Yragyň “Al Ahed” kanallary şäherlerde we obalarda geçirilýän çäreleri, Azatlyk meýdanynda görkezilen harby tehnikalary we paraşutçylaryň çykyşlaryny beýan etdiler.
