Zarif: Giňişleýin syýasy çözgüt Owganystandaky dowamly parahatçylygyň iň gowy kepili
Eýranyň Daşary işler ministri ähli owgan toparlarynyň gatnaşmagynda giňişleýin syýasy çözgüt Owganystandaky dowamly parahatçylygyň iň gowy kepilidir diýdi.
Daşary işler ministrliginiň Maglumat we metbugat sekretarynyň habaryna görä, şu gün Tähranda Owganystanyň milli howpsuzlyk geňeşçisi Hamdollah Moheb bilen geçirilen duşuşykda Eýranyň Daşary işler ministri Muhammet Jawad Zarif Tähranyň Kabula goldaw bermegini Eýran Yslam Respublikasynyň usully syýasaty diýip atlandyrdy.
Zarif, iki dostlukly we goňşy ýurt Eýran bilen Owganystanyň arasynda ikitaraplaýyn, sebitleýin we halkara derejesinde geňeşmeleri çuňlaşdyrmagyň zerurdygyny aýtmak bilen haf-Herat demir ýolunyň açylmagyna kanagatlanma bildirdi we muňa iki ýurduň arasyndaky hyzmatdaşlygy giňeltmek we gündogar sebitler bilen has çalt aragatnaşyk gurmak üçin esas hökmünde baha berdi.
Eýranyň diplomatik gullugynyň başlygy ABŞ-nyň we beýleki daşary ýurt goşunlarynyň Owganystandan çykarylmagyny hem nygtady.
Owganystanyň milli howpsuzlyk geňeşçisi parahatçylyk gepleşikleri bilen baglanyşykly soňky wakalar barada hasabat hödürledi we Eýran Yslam Respublikasynyň Owganystanyň hökümetini we halkyny goldaýan pozisiýalaryna ýokary baha berdi.
Hamdullah Moheb, haf-Herat demir ýolunyň açylmagyna ünsi çekip, şeýle ugurlar bilen sebitleýin hyzmatdaşlygyň güýçlenjekdigine umyt bildirdi.
Syýasy, ykdysady we howpsuzlyk ugurlaryndaky hyzmatdaşlyk, iki ýurduň bilelikdäki komissiýasynyň döredilmegi we beýleki taslamalara ymtylmak, esasanam suw pudagynda has köp hyzmatdaşlyk Eýranyň Daşary işler ministri bilen Owganystanyň milli howpsuzlyk geňeşçisiniň arasynda geçirilen gepleşikleriň beýleki meselelerinden ybaratdyr.
