Azərbaycan Respublika mediyaonədə İroni milləti əzəmətinə aksiyaon barədə xəbon.
Çı İroni çand ruji mıddətədə iğtişoşçion hərəkəti məhkum karde xoto İroni milləti zinə və ımruji əzəmətinə aksiyaon Azərbaycan Respublika mediyaonədə vey diğğəti bəştə tərəf cəlbış kardə.
Apa aqentiyəti qıləy raportədə ğeydış kardə: İroni millət muxtəlifə şəhronədə fitnəkoron məhkum karde xoto bə Amerkə, siyonist rejim və iğtişoş əkəyon əleyh şoar doe bəpeştə, İroni milləti əmniyyəti xərob əkəyon mıhokimə tələb kardən.
Buko xəbə rujnomə həm ğeydış kardə: çand həzo çı İroni millət İroni Yolə Rəhbəri bəyoniyə bəpeştə deşmənon noəmn əkə hərəkəton məhkum kardero fitnəkoron rısvo kardən.
Report aqentiyəti həm elanış kardə: çı İron və Azərbaycan Respublika parlemantiyə həmkarion kamissiya qıləy ozv Aydin Mirzadə İroni daxıliyə koonədə mıdoxiləon məhkumış kardə.
Maidə Az aqentiyəti raportədə həm omə ki İroni millət deştə əzəmətinə aksiya İronədə iğtişoş əkəyon mıhokimə tələb kardən.
Yeni Musavat rujnomə həm çı İroni Sepah təşkilati fərmondə sıxənon mıntəşir karde bəpaştə təsdiğış kardə ki İronədə de fitnəkoron məğlubiyəti, ijən deşmən məğlub be.
Dəvarde haftə 5 şambə rujiku İroni bəzi şəhronədə cəmaət de aksiyaon bəzi puliyə muəssisəon vəziyəti mıəyyən nıbey, ərzağon boho bey ijən dıvləti nəzorəti zəifəti xoto etırozon bino kardən ki bəzi fitnəkoron sue-istifodə karde zəminəon bois be.
Amerkə və siyonist rejimi rəsmi şəxson ijən xarıciyə mediyaon ım vəziyətiku istifodə karde sayədə iğtisodi etıroz aksiyaon bə siyasi iğtişoşon tərəf bardən.
Çımiku bə nav, 2009 sorədə həm İronədə prezidenti səçıni nooromtətion bəpeştə Amerkə, İnqeltra və vabəstə bıə onsoron ıştə həmmə imkanaton vasitə bə İroni islamiyə nizomi zərbə varid karde fikədə bıən ki İroni millət çəvon fitnəon xonsa kardən.