İlham Əliyevi nuə mılkon

Prezident İlham Əliyev iyuli 3-də “Xankəndi” Mehmonxonə Kompleksi aid bə “Xankəndi” Biznes Mərkəz və “Xankəndi” Konqres Mərkəzi oj kardə mərosimədə iştirok kardəşe.

De jurnaliston bardə tədğiğoti məlum bəbe ki, “Xankəndi” Mehmonxonə Kompleksi aid bə “Qarabağ”, “Palace” və “Bulud” hotelon bə Azərboycon Respublika Prezidenti koon İdorə nəzdədəy. Bə hotelon onoe yaxud bərpo budcəku çanəndə vəsoit co karde, çəy xarc be, kon şirkəton tərəfo bə jimon dəvone barədə məlumat doə bə ni.
Eynən “Xankəndi” Biznes Mərkəz və Konqres Mərkəzi ro ın məlumaton sırr mandən.
Ço mərtəbəninə “Xankəndi” Biznes Mərkəzi umumi sahə 4500 kvadratmetrisə ziyode. İyo 24 ofis sahə, 6 qılə konferens zal hıste. Mərkəzədə bo 120 xonəxo nəzədə qətə “Zefir Cafe & Terrace” restoran,  dəftərxona və mətbəə məhsulon həvate, kimyəvi təmiz kardə və camaşırxonə xıdməton fəoliyyət nuşu bədon.
De muasir texniki cıhozon təchiz bə Konqres Mərkəzi sahə 6500 kvadratmetre. İyo teatral uslubədə 600, ziyofət uslubədə 350 xonəxo ro tədbir zalon, konfrans və curə-bəcurə təyinotinə otağon onoə bən.
Eksperton və jurnaliston mutəmadi ozod bə ərazionədə bərpo və onoə koon ğeyri-şəffof be, bın proyekton ro xəzinəko co kardə vasoiton bo toyfə şirkəton aid be barədə xəbə dodən.