İntiharon miğdar şe-şe ziyod bedə

Yanvarə manqi 10-minə ruji Masəlu Rayoni Məhkəmə bina vədə Şərəfə diy sakin Zeynalov Raqifi bəştə ğəsd kardışe, ıştənış sute. Dı nəfər polisi səyi nəticədə çey jimoni xilas karde mumkun bıe. Əv təcili bə Boku vığandışone. Həkimon votəşone ki, çey səhhət xeyli qıvonine.

"Xural.com" bə "Bizimyol.info" əsasən xəbə dodə ki, Raqifi bə banki kreditə ğarzış bıə. Ey oqırdınie ro imkanış nıbe səbəbiku məhkəmə çey maaş tam musadirə kardəşe. De ım ğəsdi əlağədar Masəlu prokuratura de Cinayətə Məcəllə "bəştə ğəsd karde hədd rosnie" maddə cinayətə ko bino kardəşe. Əmo tosə ısət Respublikadə çanədə intihar hadison bıən, prokuratura canədə cinayətə ko oj kardəşe, şəhrıvandon bə intihar hədd rosniə taxsikaronədə  hic kəs bə məsuliyyət cəlb bıə nin, hiç kəsi hiç qıley cəzo sə nişe.

Im hadisə 1 ruj bə nav Respublikadə i rujədə 4 nəfəri bəştə ğəsd kardışe. Bokuədə qıley cıvoni ıştən bə metro poyizi ji şodoşe, Bərdə rayoni Əliyanlı diədə və Ağdam rayoni Boyəhmədli diədə 2 nəfər cıvoni ıştən ehaştışone. Boku dıyokənoə parkədə ışley əslən Likijə cıvonə şair -tələbə ıştənış dıyoədə tosnie.

Yanvari 11-ədən Lankoni Qırdəni diy sakin, 2 qılə əğılinə xeyzoni  xıvandi bəştə de ehaşte roy ğəsd kardəşe.

Az.R-ədə intiharə hadison miğdari sorbəsor ziyod bıe həni hiç kəsiku niyo ni. Nafkonə soronədə Ğeyri Hokumətə Təşkilaton ım hadison monitorinqi bardedəbin, çəvon səbəb və hisobi təhlil kardedəbin. Isət jıqo məlumaton nıbe nişon dodə ki, Boku hokuməti bə ım informasion ğədəğə noəşe. Əmo ım hadison barədə ğıssə xəbon jıqo qıley fakti bə oşko bekardedə ki, Respublikadə intiharə hadison xeyli ziyod bıə, çimiən əsasə səbəb xalqi quzərani bə səfalətə hədd rəseyədey.